Danski varnarmaðurinn Jesper Juelsgaard vill helst gleyma frumraun sinni með danska félaginu Fredericia.
Juelsgaard lék með Val hér á landi í fyrra. Hinn 33 ára gamli Juelsgaard var kallaður á fund hjá Val í október og hélt að það ætti að ræða við hann um fríið eftir að tímabilinu á Íslandi væri lokið. Þess í stað var honum tjáð að hann gæti skipulagt flug til Danmerkur en ekki til baka.
Hann samdi við Fredericia í dönsku B-deildinni en fór ekki vel af stað. Juelsgaard gerði mistök sem leiddu að marki í 2-0 tapi liðsins gegn Hillerød.
„Þetta var ekki góð bílferð heim og ég átti ekki gott kvöld heldur," sagði Juelsgaard eftir leikinn.
Juelsgaard er fyrrum landsliðsmaður sem á ferlinum hefur leikið tæplega 300 leiki í Superliga með Midtjylland, Bröndby og AGF. Hann getur bæði spilað sem vinstri bakvörður og miðvörður. Fredericia er í 10. sæti næstefstu deildar og þarf að gera vel til að halda sæti sínu í deildinni.
Athugasemdir