16-liða úrslit Meistaradeildarinnar eru í fullu fjöri og eru tveir leikir á dagskrá í kvöld þar sem Liverpool tekur á móti Real Madrid í risaslag.
Liverpool endaði í öðru sæti riðilsins eftir Napoli á markatölu og mætir því ríkjandi meisturunum í endurtekningu frá úrslitaleiknum sem fór fram síðasta vor. Real Madrid hafði þar betur með einu marki gegn engu þrátt fyrir mikla yfirburði Liverpool í leiknum.
Bæði lið hafa verið hikstandi á leiktíðinni en þó sérstaklega Liverpool og verður áhugavert að fylgjast með þessum stórslag sem verður sýndur í beinni útsendingu á Stöð 2 Sport 2.
Napoli, sem vann riðilinn með Liverpool, á einnig leik í kvöld. Topplið ítölsku deildarinnar heimsækir þar Eintracht Frankfurt til Þýskalands.
Frankfurt vann Evrópudeildina í fyrra og öðlaðist þannig þátttökurétt í Meistaradeildinni þrátt fyrir að hafa endað í ellefta sæti þýsku deildarinnar. Liðið er í sjötta sæti deildarinnar sem stendur, aðeins fimm stigum frá toppnum.
Frankfurt endaði í öðru sæti síns riðils, einu stigi eftir toppliði Tottenham, en Sporting CP og Marseille komu í næstu sætum fyrir neðan.
Þessi viðureign verður gífurlega spennandi en Napoli er spáð sigri enda er liðið á ótrúlegu skriði á toppi ítölsku deildarinnar.
Leikir kvöldsins:
20:00 Eintracht Frankfurt - Napoli (Viaplay)
20:00 Liverpool - Real Madrid (Stöð 2 Sport 2)