| mán 21. september 2020 18:25 |
|
Pepsi Max-deildin: Öruggur sigur ÍA á Gróttu
Tryggvi Hrafn Haraldsson skoraði tvö mörk fyrir ÍA
1-0 Tryggvi Hrafn Haraldsson ('26 )
2-0 Sigurður Hrannar Þorsteinsson ('82 )
3-0 Tryggvi Hrafn Haraldsson ('87 , víti)
Skagamenn náðu í langþráðan sigur í kvöld er liðið vann Gróttu 3-0 á Norðurálsvellinum í Pepsi Max-deild karla. Tryggvi Hrafn Haraldsson gerði tvö mörk gegn nýliðunum.
ÍA hafði ekki unnið í síðustu fjórum leikjum sínum í deildinni en síðasti sigur liðsins kom gegn KA þann 15. ágúst.
Gróttumenn hafa á meðan verið í basli með að landa þremur stigum en eini sigur liðsins í deildinni var gegn Fjölni í byrjun júlí.
ÍA komst yfir á 26. mínútu í kvöld en Tryggvi Hrafn skoraði þá beint úr hornspyrnu. Staðan var 1-0 í hálfleik og komu Gróttumenn með ágætis innkomu inn í síðari hálfleikinn.
Skagamenn náðu hins vegar tökum á leiknum og skoruðu tvívegis undir lokin. Sigurður Hrannar Þorsteinsson gerði annað markið á 82. mínútu eftir fyrirgjöf frá Gísla Laxdal. Fimm mínútum síðar fengu Skagamenn svo vítaspyrnu sem Tryggvi Hrafn skoraði örugglega úr.
Lokatölur 3-0 fyrir ÍA sem er nú með 17 stig í 7. sæti á meðan Grótta er með 7 stig í næst neðsta sæti deildarinnar. Bæði lið hafa spilað fimmtán leiki.
Athugasemdir
Nýjustu fréttirnar
