Fleiri útlendingar á leiðinni
Kristján Guðmunds var hress eftir æfingaleikinn.
ÍBV fékk FH í heimsókn í síðasta æfingaleik liðanna fyrir Íslandsmótið og höfðu Hafnfirðingar betur með tveimur mörkum gegn engu.
„Þetta var fínn leikur hjá báðum liðum, það var smá deildarfílingur í þessu," sagði Kristján Guðmundsson þjálfari Eyjamanna eftir tapið.
Kristján segir margt jákvætt hægt að taka úr leiknum þrátt fyrir tap og er ánægður með frammistöðu sinna manna þegar tók að líða á leikinn.
„Við erum mjög ánægðir með hvernig apríl hefur spilast hjá okkur, æfingaferðin kom vel út. Þetta er öðruvísi undirbúningstímabil heldur en í fyrra þegar við náðum ekki að spila neina leiki. Við þökkum FH-ingum fyrir að hafa komið hingað."
Kristján segist mjög spenntur fyrir komandi sumri enda sjaldan verið jafn mikil spenna og eftirvænting fyrir tímabil í Pepsi-deildinni.
„Þetta gæti orðið jafnari deild og ég held þetta sé bara áframhaldandi styrkleiki í íslenskum fótbolta. Liðin sem er búið að vera að tala niður fyrir sumarið líta ágætlega út og við verðum bara að sjá hvað verður.
„Það er alltaf erfitt að eiga við toppliðin en eins og við sáum núna þá gerðum við marga góða hluti og fengum fullt af opnum og góðum færum."
Kristján telur ríkjandi Íslandsmeistara Vals vera líklegasta til að hampa titlinum í sumar.
„Þeir gera tilkall til þess. Þeir tapa varla leik núna og það er spurning hvort þeir svitni í fyrri hálfleik í leikjunum sínum."
Kristján segir að fleiri útlendingar séu á leið til Vestmannaeyja, enda sé liðið í útlendingakeppni við FH. FH er með níu útlendinga í sínu liði en ÍBV átta.
„Við munum bæta við í þessari viku, það er alveg á hreinu."
Athugasemdir
