„Ég er hundfúll, það er ósköp einfalt," sagði Hermann Hreiðarsson þjálfari ÍBV eftir 2 - 3 tap gegn FH í Vestmannaeyjum í kvöld.
Lestu um leikinn: ÍBV 2 - 3 FH
„Það eru risaatriði hérna í 2 - 2 þegar við erum aðeins að stíga á þá og vorum með leikinn fannst mér á þeim tíma. Að reka hann útaf er svo glórulaust og ég er búinn að segja það við hann. Hann er kominn í gegn, er rifinn niður og svo er hann rekinn útaf. Hann er að rífa sig lausan, hvar er common sense orðið í þessu. Er það bara farið út um gluggann?"
Hermann var ósáttur við rauða spjaldið sem Hermann Þór Ragnarsson fékk að líta í leiknum fyrir að gefa leikmanni FH á kjammann á 78. mínútu. Þetta var annar leikurinn í röð sem leikmaður ÍBV fær að líta rautt spjald fyrir slíkt brot. Þetta var líka annar heimaleikurinn í röð sem ÍBV tapar með marki á lokamínútunum. Var það áhyggjuefni?
„Nei, við vorum manni færri og þetta gerist. Við vorum sterkari og að vaxa inn í leikinn í restina. Þetta herðir okkur. Við höfum lent í mótlæti áður og þetta er ekki í fyrsta skipti. Það hallar á okkur í ákveðnum málum og það er eitthvað sem ég er mjög ósáttur við."
Viðtalið má sjá í spilaranum að ofan.
