„Það er mjög spennandi að byrja undankeppnina á Þýskalandi. Þeir eru með frábært lið og það verður skemmtilegt fyrir okkur að testa þetta með nýja teyminu," sagði Ari Freyr Skúlason varnamaður Íslands á æfingu liðsins í Þýskalandi í gær en liðið mætir heimamönnum í undankeppni HM 2022 á fimmtudaginn. Ari var spurður næst hvort við getum unnið Þýskaland?
„Já afhverju ekki? Við höfum náð góðum úrslitum undanfarin ár og afhverju ætti það ekki að vera gegn Þýskalandi," sagði hann en á Covid tímum verður áfram tóm stúka á leiknum.
„Það er búið að vera skrítið að spila með enga áhorfendur en Þýskaland er frábært fótboltalið. Þetta er bara allt annar leikur með stuðningsmönnum eða án. Adrenalín kikkið er ekki eins mikið, það gefur mannni alltaf auka að heyra stemmninguna á vellinum. Svo heyrir maður hvert einasta orð sem allir segja og þetta er eins og vináttuleikur. En ef maður gírar sig upp í þetta er þetta ekkert vesen."
Þetta verður fyrsti leikur Íslands undir stjórn Arnars Þórs Viðarssonar en Eiður Smári Guðjohnsen og Lars Lagerback eru með honum.
„Ég þekki Arnar frá mínum tíma hjá Lokeren. Hann er frábær þjálfari, svo fáum við Eið inn sem er fótboltasnillingur og svo hjálpar Lars þeim með sína hugmyndafræði og það sem hann hefur gert á sínum ferli. Ég er mjög spenntur fyrir þessu."
Lars Lagerback þjálfaði Íslenska liðið í nokkur ár og kom okkur í lokakeppni EM 2016 þar sem liðið náði mögnuðum árangri og komst í 8 liða úrslit. Ari er þakklátur Lars.
„Ég á honum mikið að þakka. Það sem hann gerði fyrir mig og minn landsliðsferil. Hann fylgdist með mér þegar ég var á miðjunni í Svíþjóð og var hreinskilinn og sagði 'ég held þú fáir ekki mörg tækifæri á miðjunni en ég get alveg sagt þér það að ég mun nota þig ef þú breytir þér í vinstri bakvörð' og ég gerði það. Hann er frábær einstaklingur og góð manneskja."
Ari veiktist af Covid-19 fyrr í vetur og sagði okkur að lokum hvernig lífsreynsla það var.
„Guði sé lof, þá sluppum við fjölskyldan vel úr þessu. Krakkarnir voru einkennalaus og ekkert að kvarta. Ég og konan misstum bragð og lyktarskyn. Við vorum bara mjög heppin. Bragð og lyktarskyn er komið hjá mér en konan er enn í smá brasi."
Athugasemdir