Ben Foster hefur ákveðið að taka hanskana af hillunni og hefur samið við Wrexham í utandeildinni. Wrexham er spennandi félag sem stefnir upp í D-deildina en eigendur félagsins er Hollywood leikararnir Ryan Reynolds og Rob McElhenney.
Foster ákvað í vetur að leggja hanskana á hilluna, það gerði hann í kjölfarið á tilboði frá Newcastle en Foster vildi frekar verja tíma sínum með fjölskyldunni en að flytja norður til Newcastle. Tottenham reyndi einnigað fá Foster þegar Hugo Lloris meiddist í janúar en Foster sagði nei.
Foster er stærsta nafnið sem Wrexham hefur fengið í eigendatíð leikaranna, og líklega í sögunni. Hann verður fertugur í apríl og spilaði síðast með Watford á síðasta ári þegar liðið féll úr úrvalsdeildinni. Hann hefur áður verið hjá velska félaginu því hann var lánaður þangað frá Stoke árið 2005.
Wrexham er í toppsæti National League, þremur stigum fyrir ofan 2. sætið. Fimmtán ár eru frá því að liðið féll úr D-deildinni. Rob Lainton, aðalmarkvörður liðsins, meiddist á hné og verður fjarri góðu gamni næstu sex vikur.
Athugasemdir
