Spænska blaðið AS segir að Tottenham hafi áhuga á því að fá Rodrygo frá Real Madrid í sumar.
Rodrygo, sem er 24 ára gamall og kominn neðarlega í goggunarröðinni hjá Madrídingum, má fara frá félaginu í sumar, en hann mun taka ákvörðun um framtíð sína á næstu vikum.
Liverpool er sagt leiða kapphlaupið um Rodrygo, en það mun velta á því hvort Luis Díaz verði seldur eða ekki.
AS segir að Tottenham hafi áhuga á því að vera með í baráttunni og vilji koma með yfirlýsingu á markaðnum eftir að hafa unnið Evrópudeildina á síðustu leiktíð.
Félagið hefur þegar landað Mohammed Kudus frá West Ham og er Morgan Gibbs-White einnig sagður á leið þangað.
Samband Tottenham og Real Madrid er afar gott og vonar Daniel Levy, stjórnarformaður enska félagsins, að hann geti sannfært Real Madrid um að lækka verðmiðann á Rodrygo.
Á þessu augnabliki er boltinn hjá Rodrygo sem þarf að gera upp hug sinn hvort hann ætli að sætta sig við lítið hlutverk hjá Real Madrid eða fara í lykilhlutverk hjá öðru félagi.
Athugasemdir
