Arnar Þór Valsson
Arnar Þór Valsson, þjálfari ÍR í Inkasso-deild karla, var svekktur með 3-2 tap liðsins gegn Keflavík í kvöld. Hann var þó ósáttur með þrjá menn á vellinum í dag.
Lestu um leikinn: Keflavík 3 - 2 ÍR
„Nei, ég er ósáttur með þrjá menn í þessum leik. Það vita allir hverjir það eru og ég ætla ekki að fara nánar út í það en Keflavík er með mjög gott lið og besta liðið í deildinni að mér finnst," sagði Addó við Fótbolta.net en hann vísar þar væntanlega í dómaratríóið.
Leonardo Sigurðsson skoraði sigurmarkið fyrir Keflavík en Addó vildi meina að hann hefði verið vel fyrir innan og því rangstæður.
„Það sem á eftir að skipta sköpum í þessum leik eru litlu hlutirnir og það er nákvæmlega það sem gerðist og þetta var jafn leikur úti á vellinum. Við náðum að standa vel í þeim og við áttum að vera búnir að hreinsa boltanum í sigurmarkinu en þetta er pjúra rangstaða, hann er fjóra metra fyrir innan held ég."
„Algerlega. Mér finnst það og eins og ég segi þá á ég erfitt með að gagnrýna menn. Mínir menn gerðu fullt af mistökum og ég er búinn að gera fullt af mistökum en þau eru bara svo rosalega dýr mistök sem verða akkurat í svona aðstæðum."
„Það er öskrað á dómara og allt það en þetta er svo rosalega dýrt en annars var ég mjög sáttur með dómgæsluna og flottur leikur og gaman að horfa."
Það var mikil barátta í ÍR-ingum eins og hefur iðulega sést í sumar og það er það eina sem hann biður um frá sínum mönnum.
„Í raun og veru og það er það eina sem ég bið um frá mínum mönnum. Það er að skilja allt eftir úti á vellinum og geta labbað útaf honum og geta sagt að þeir hafi gert sitt besta. Þetta var jafn leikur og við jafnvel betri," sagði hann ennfremur.
Hægt er að sjá viðtalið í heild sinni hér fyrir ofan.
Athugasemdir
