Sky Sports greinir frá því að þýski þjálfarinn Julian Nagelsmann er opinn fyrir að hefja samningsviðræður við Tottenham.
Enska félagið virðist vera í leit að nýjum stjóra þar sem Antonio Conte er staddur úti á Ítalíu þessa dagana. Cristian Stellini, aðstoðarmaður Conte, sér um æfingar félagsins í landsleikjahlénu.
Nagelsmann var rekinn frá FC Bayern í gær, meðan hann var í skíðaferð með kærustu sinni, og er sagður vilja taka sér nokkrar vikur í frí áður en hann tekur ákvörðun varðandi framtíðina.
Conte rennur út á samningi hjá Tottenham í sumar og hefur Daniel Levy, forseti Tottenham, miklar mætur á Nagelsmann. Hann ætlar að leggja allt púður í að krækja í Nagelsmann sem fyrst.
Levy hefur tvívegis reynt að fá Nagelsmann til að taka við keflinu hjá Tottenham en án árangurs. Hann vonast til að þriðja tilraunin gangi upp.