Átti flottan leik gegn Stjörnunni.
Í baráttunni við Emil Atlason.
Ásgeir Helgi Orrason fékk traustið frá þjálfarateymi Breiðabliks fyrir leikinn gegn Stjörnunni og var í byrjunarliði liðsins. U21 landsliðsmaðurinn átti góðan leik í hjarta varnarinnar.
„Frábært að hann grípi þetta tækifæri og nauðsynlegt," sagði Sæbjörn Steinke í Innkastinu þar sem 3. umferðin í Bestu deildinni var gerð upp.
„Frábært að hann grípi þetta tækifæri og nauðsynlegt," sagði Sæbjörn Steinke í Innkastinu þar sem 3. umferðin í Bestu deildinni var gerð upp.
Lestu um leikinn: Breiðablik 2 - 1 Stjarnan
„Hann var frábær með Keflavík í fyrra þar sem hann var á láni og við sem þjóð þurfum bara á því að halda að lið séu að kasta ungum varnarmönnum í djúpu laugina, landsliðið þarf á því að halda að við séum að treysta á unga Íslendinga í vörnina," sagði Elvar Geir.
Ásgeir lék vel með Keflavík í fyrra, lék bæði í vörninni og á miðjunni. Bæði Keflavík og ÍA reyndu að kaupa hann af Breiðabliki í vetur.
„Þegar við lengdum deildina (úr 22 í 27 leiki) þá man ég að ein af rökunum fyrir því væru þau að menn myndu þora að spila meira á ungum leikmönnum. Það hefur heldur betur ekki verið þannig. Ásgeir spilaði bara drulluvel," sagði Valur Gunnarsson.
Arnór Gauti Jónsson fór úr hjarta varnarinnar og spilaði á miðsvæðinu og á bekkinn fór Anton Logi Lúðvíksson sem var tæpur vegna meiðsla.
„Ásgeir fær í þessum leikjum að eiga við tvo framherja, stóra leikmenn í Andra Rúnari og Emil, sem eru bara frammi. Það er kannski aðeins öðruvísi ef þú ert á móti hlaupagikk sem þú veist ekki hvort þú eigir alltaf að elta eða ekki," sagði Sæbjörn.
Umræðuna um leik Breiðabliks og Stjörnuna má nálgast eftir 24 mínútur í spilaranum hér að neðan.
Athugasemdir
