Arsenal var í viðræðum við Higuain sumarið 2013 en hann vissi að hann væri ekki að fara fá nægan spiltíma hjá Real Madrid.

Enska félagið var búið að ræða við Higuain og föruneyti hans en ákvað að hætta við kaupin á síðustu stundu þar sem það sagðist ekki hafa efni á því að fá hann.

Higuain gekk því til liðs við Napoli en tveimur dögum síðar keypti Arsenal þýska sóknartengiliðinn Mesut Özil. Félagið greiddi 42,5 milljónir punda fyrir hann þó Higuain haldi öðru fram.

„Áður en ég samdi við Napoli þá var sá möguleiki fyrir hendi að semja við Arsenal. Við höfðum rætt saman en félagið ákvað að sleppa því að kaupa mig og keyptu Özil fyrir 80 milljónir evra eða eitthvað svoleiðis," sagði Higuain.

„Þeir sögðu við mig að þeir ættu ekki mikinn pening til að eyða í leikmenn og ég væri of dýr. Ég ákvað því að fara til Napoli, en svo tveimur dögum síðar sé ég að Özil var keyptur fyrir 80 milljónir evra," sagði hann og hló.