Gennaro Ivan Gattuso og lærisveinar hans í Napoli unnu Juventus 2-1 í Seríu A í kvöld.

Napoli var án margra lykilmanna í kvöld en það vantaði Kalidou Koulibaly, Dries Mertens og Allan á meðan Juventus var með afar sterkt lið.

Þrátt fyrir það var jafnræði með liðunum í fyrri hálfleik áður en Napoli tók yfir í þeim síðari.

Pólski miðjumaðurinn Piotr Zielinski kom Napoli á bragðið á 63. mínútu. Lorenzo Insigne átti þá skot sem Wojciech Szczesny varði út á Zielinski sem skoraði. Insigne var svo sjálfur á ferðinni á 86. mínútu áður en Cristiano Ronaldo minnkaði muninn undir lokin.

Ronaldo var að skora áttunda deildarleikinn í röð en lengra komst Juventus þó ekki. Lokatölur 2-1 fyrir Napoli sem situr í 12. sætinu með 27 stig. Juventus er enn á toppnum með 51 stig.