Vandræðagemsinn Mohamed Ihattaren er byrjaður að æfa aftur með Juventus eftir að honum var sleppt úr gæsluvarðhaldi lögreglunnar í Amsterdam.
Ihattaren, sem er fæddur 2002, er sóknarsinnaður miðjumaður á mála hjá Juventus sem hefur þó aldrei komið við sögu með aðalliði félagsins.
Ihattaren á leiki að baki fyrir PSV Eindhoven og Ajax en hann var lykilmaður upp yngri landslið Hollands fyrir nokkrum árum. Meiðsli og djamm hafa sett strik í reikninginn hjá leikmanninum, sem var svo handtekinn í Amsterdam fyrir meinta líkamsárás gegn kærustu sinni.
„Það sem skilgreinir okkur er hversu sterkir við komum til baka eftir bakslag," segir Ihattaren í færslu á Instagram og birtir hvatningarmyndband af sjálfum sér því til fylgdar.
Ihattaren á tvö og hálft ár eftir af samningi sínum við Juventus en hefur ekki spilað fótbolta á háu stigi síðan hann var leikmaður PSV Eindhoven tímabilið 2020-21.
