Fiorentina vann þægilegan sigur á fallbaráttuliði Verona er liðin mættust í ítölsku deildinni fyrr í kvöld.
Fiorentina var tveimur mörkum yfir á lokakaflanum þegar vinstri bakvörðurinn Cristiano Biraghi stillti sér upp til að taka aukaspyrnu innan miðjubogans á eigin vallarhelmingi.
Samherji Biraghi lá í jörðinni og voru margir leikmenn stopp útaf því. Biraghi leit upp eftir að hafa stillt boltanum á jörðina og tók eftir að Lorenzo Montipo' var kominn langt út úr markinu.
Biraghi ákvað að nýta sér tækifærið og lét vaða. Skotið flaug yfir Montipo og í netið við litla hrifningu leikmanna Verona sem mótmæltu ákaft.
Þetta mark kom öllum í opna skjöldu, einnig myndatökumönnum og lýsendum sem áttuðu sig ekki á því sem gerðist fyrr en leikmenn Fiorentina voru fagnandi við endalínuna.
