Orri Steinn Óskarsson er í banastuði með FCK í danska bikarnum, en hann er kominn með tvö mörk og eina stoðsendingu er liðið er að vinna Lyseng, 5-0, í hálfleik.
Landsliðsmaðurinn hefur verið að fá tækifærin með FCK á þessu tímabili og gert vel, en hann fékk auðvitað að byrja þennan leik, gegn D-deildarliði Lyseng.
Orri er að leika sér að andstæðingnum. Hann gerði fyrra mark sitt á 15. mínútu með þægilegri afgreiðslu. Annað markið var í flottari kantinum, en þar fór hann illa með nokkra varnarmenn Lyseng og markvörðinn í leiðinni áður en hann skoraði.
Seltirningurinn lagði síðan upp fimmta markið fyrir sænska undrabarnið Roony Bardghji.
Staðan 5-0 í hálfleik og vonandi að þrennan verði fullkomnuð í þeim síðari, en það yrði önnur þrennan á tímabilinu.
Orri hefur nú komið að ellefu mörkum á þessari leiktíð og er greinilega bara rétt að byrja.
Athugasemdir
