Hákon Rafn er aðalmarkvörður íslenska landsliðsins með 17 leiki að baki.
Hákon Rafn Valdimarsson er kominn inn af bekknum í spennandi úrvalsdeildarslag þar sem Brentford er að spila útileik gegn Brighton & Hove Albion.
Hákon Rafn ver því mark Brentford allan seinni hálfleikinn en hann kom inn á 36. mínútu eftir meiðsli Mark Flekken sem er aðalmarkvörður Brentford.
Hákon Rafn er 23 ára gamall og á þrjú og hálft ár eftir af samningi sínum við Brentford, en hann er að spila sinn fyrsta úrvalsdeildarleik í dag.
Hákon hefur varið mark Brentford í tveimur leikjum hingað til en þeir voru báðir í deildabikarnum gegn Colchester og Leyton Orient. Hákon varði fjögur skot og fékk eitt mark á sig í þessum tveimur leikjum en fékk ekki að verja mark Brentford í næstu umferð deildabikarsins sem var gegn Newcastle. Sá leikur tapaðist 3-1.
Staðan er markalaus eftir fyrri hálfleik Brighton og Brentford en heimamenn í liði Brighton hafa verið að gera sig líklega til að skora. Þeir hafa átt 15 marktilraunir í fyrri hálfleik gegn tveimur frá Brentford, en Brentford kom boltanum þó í netið en markið ekki dæmt gilt vegna afar naumrar rangstöðu.
Athugasemdir
