Kemur þetta frá þér að fyrra bragði eða voru einhverjir frá Völsungi búnir að hafa samband við þig?

„Það er stjórnarmaður í Völsungi sem er búinn að vera gera mig gjörsamlega geðveikan í allan vetur, það er óhætt að segja að þeir hafi verið í sambandi. Það var gott að leyfa þeim að svitna aðeins þangað til á síðasta degi."

„Nei, ég er í raun ekki horfa í neina dagsetningu sem einhvern möguleika á að spila. Ég á eftir að fara yfir þetta og heyra í þeim. Þetta snýst ekki bara um hvað ég vil, heldur líka hvað þeir vilja - hvort og hvenær þeir myndu vilja nota mig og hvort það passi fyrir mig. Þetta var fyrsta skrefið, ég er allavega löglegur ef til þess kemur."

Pálmi er uppalinn í Völsungi og steig þar sín fyrstu skref í meistaraflokki. Hann væri því að loka hringnum ef hann myndi spila með Völsungi í sumar.

„Það er svolítið þannig. Það situr svolítið í mér að síðasta leikurinn á ferlinum var án fjölskyldunnar í stúkunni. Það var ekki planið að Víkingur úti yrði síðasti leikurinn á ferlinum. Ég fór í bann þá, konan og strákarnir mínir voru bara heima í rólegheitunum."

„Núna hef ég möguleikann á að taka allra síðasta leikinn með þau í stúkunni, mömmu og pabba og fjölskyldu. Það er mjög rómantísk hugsun. Við verðum bara að sjá hvað setur."

Sjá einnig:
Pálmi Rafn ræddi við dómarann að leikslokum: Ógeðslega svekktur

Reynsluboltinn Baldur Sigurðsson lék með Völsungi í fyrra. Er Pálmi búinn að ræða við Baldur og veit Pálmi hvort Baldur ætli að taka slaginn aftur í sumar?

„Ég er búinn að heyra í honum hljóðið og mun að sjálfsögðu heyra í honum aftur hvort hann taki sjálfur einhverja leiki. En ég skal ekki svara fyrir hann, það á eftir að koma í ljós."

Pálmi var í leikmannahópi KR í einum leik í Reykjavíkurmótinu í vetur, þegar KR mætti ÍR. Hver er sagan á bak við það?

„Ég fékk að vera með á einni æfingu í aðdraganda leiksins. Ég var bara svo ógeðslega góður að ég komst í hópinn," sagði Pálmi léttur. „Ég var á bekknum einu sinni, en það var bara svona tilfallandi - vegna ótrúlegra gæða. Bara back-up ef það þyrfti," sagði Pálmi að lokum.