Tumi Fannar í Fylki (Staðfest)

Fylkir hefur fengið Tuma Fannar Gunnarsson á láni frá Breiðabliki út komandi tímabil.

Tumi Fannar er tvítugur miðjumaður sem lék fjóra leiki með Breiðabliki á síðasta tímabili þegar liðið varð Íslandsmeistari. Tumi kom sér á blað með Breiðabliki í bikarsigrinum á Fjölni fyrir rúmri viku síðan.

Hann mun spila í Lengjudeildinni í sumar, með liði Fylkis sem ætlar sér að vinna deildina. Fyrsta umferð Lengjudeildarinnar fer að mestu fram á föstudagskvöld og þá heimsækir Fylkir lið Njarðvíkur.