Neco Williams, leikmaður LIverpool, átti fínan leik er liðið vann Preston 2-0 í enska deildabikarnum í gær en hann lagði upp bæði mörk liðsins.
Williams er tvítugur hægri bakvörður sem hefur verið á mála hjá Liverpool frá því hann var átta ára gamall.
Hann hefur spilað þrjá leiki á þessari leiktíð og nýtt þær mínútur vel. Velski leikmaðurinn á aðeins sjö mínútur í úrvalsdeildinni þar sem hann lagði upp mark gegn Watford.
Williams var í byrjunarliðinu gegn Preston í gær og lagði upp fyrra markið fyrir Takumi Minamino og færðist svo hærra á völlinn í þeim síðari. Hann átti stóran þátt í seinna markinu sem Divock Origi skoraði.
„Preston er gott lið og gáfu okkur alvöru leik. Við spiluðum kannski ekkert alltof vel en við gerðum nóg til að ná í sigurinn og við erum ánægðir með það. Liðið skilaði góðri vakt," sagði Williams.
Williams bjargaði á línu í fyrri hálfleik eftir mikla atlögu frá Preston en hann man þó ekki mikið eftir atvikinu.
„Ég fékk boltann beint á munninn og man ekki mikið. Ég var þarna á línunni og fannst ég eiga góðan möguleika á að koma í veg fyrir mark. Sem betur fer fékk ég hann í smettið og kom í veg fyrir markið."
„Ég reyndi að spila eins hátt uppi og ég gat. Ég hefði átt að skora en það skiptir ekki máli. Vonandi tekst mér það í næsta leik. Mér fannst ég gera vel og gaf allt sem ég átti í þetta. Ég fékk smá krampa í lokin ætli það sé ekki eðlilegt eftir alla þessa vinnu," sagði hann í lokin.
Athugasemdir