Man City kom sér í þægilega tveggja marka forystu á fyrstu 25 mínútum leiksins.

Phil Foden skoraði á 2. mínútu leiksins. Bernardo Silva laumaði boltanum inn á Matheus Nunes sem var kominn inn á teiginn og setti hann boltann fyrir markið og á Foden sem stýrði honum í netið.

Josko Gvardiol tvöfaldaði forystu heimamanna á 25. mínútu er hann potaði boltanum í netið af stuttu færi eftir smá darraðardans á nærstönginni.

Man City komið í góða stöðu og var erfitt að sjá liðið glutra henni niður.

Lucas Perri hélt vonum Leeds á lífi með laglegri vörslu undir lok fyrri hálfleiks sem virtist rífa hans menn upp í byrjun síðari hálfleiksins.

Dominic Calvert-Lewin minnkaði muninn á 49. mínútu eftir skelfilegan varnarleik City-manna. Matheus Nunes átti slaka sendingu úr vörninni og náðu Leedsarar að pota boltanum inn fyrir á Calvert-Lewin sem missti hann frá sér. Misskilningur milli varnarmanna Man City varð til þess að boltinn skoppaði aftur fyrir Calvert-Lewin sem setti boltann í vinstra hornið.

Á 68. mínútu fengu Leedsarar vítaspyrnu eftir klaufalegt brot Gvardiol á Calvert-Lewin. Aldrei spurning og var það Lukas Nmecha sem fór á punktinn. Gianluigi Donnarumma varði vítaspyrnuna, en ekki lengra en aftur út á Nmecha sem spyrnti boltanum í opið markið.

Svakalegur klaufagangur í vörn Man City í seinni hálfleiknum, en einn af bestu mönnum City á tímabilinu kom þeim til bjargar með marki í uppbótartíma.

Rayan Cherki fann Foden í miðjum teignum, hann hljóp aðeins frá teignum áður en hann tók skotið og stýrði því hárfínt í vinstra hornið til að tryggja sigurinn.

Ótrúlega mikilvægt hjá Foden sem sá til þess að Man City haldi pressunni á Arsenal í titilbaráttunni, en City er nú með 25 stig í öðru sæti, fjórum stigum frá toppnum. Leeds er á meðan í 18. sæti með 11 stig.

Brentford vann Burnley, 3-1, á Community-leikvanginum í Lundúnum.

Staðan var hnífjöfn og markalaus í hálfleik, en hlutirnir fóru ekki að gerast fyrr en á lokakafla leiksins.

Brentford fékk vítaspyrnu á 81. mínútu og skoraði Igor Thiago áttunda markið sitt í átta leikjum. Gleðin varði ekki lengi hjá heimamönnum sem fengu á sig víti aðeins nokkrum mínútum síðar og jafnaði Zian Flemming metin af punktinum.

Heimamenn tóku aftur yfir með tveimur mörkum undir lok leiks. Thiago gerði annað mark sitt í leiknum á 86. mínútu og þá skoraði Dango Ouattara þriðja markið til að gulltryggja sigurinn.

Brentford er í 8. sæti með 19 stig en Burnley í næst neðsta sæti með 10 stig.

Nýliðar Sunderland unnu ótrúlegan 3-2 endurkomusigur á Bournemouth á leikvangi ljóssins.

Amine Adli og Tyler Adams komu gestunum í Bournemouth í tveggja marka forystu á átta mínútum í byrjun leiks. Adli skoraði af stuttu færi eftir ótrúlegt klúður Evanilson og þá gerði Adams annað markið með skoti af löngu færi yfir Robin Roefs sem var kominn langt út úr markinu.

Þegar um hálftími var liðinn fengu heimamenn vítaspyrnu sem Enzo Le Fee skoraði úr og strax í upphafi síðari hálfleiks jafnaði Bertrand Traore metin með skoti úr teignum eftir sendingu frá Granit Xhaka.

Brian Brobbey, sem kom til Sunderland frá Ajax í sumar, gerði sigurmark Sunderland-manna þegar tuttugu mínútur voru eftir af venjulegum leiktíma með skalla á nærstöng eftir hornspyrnu Le Fee.

Lewis Cook, leikmaður Bournemouth, fékk að líta rauða spjaldið í uppbótartíma fyrir ljótt olnbogaskot í Noah Sadiki. Ekkert sem Englendingurinn gat sagt við þessu spjaldi og Bournemouth manni færri síðustu mínúturnar.

Högg fyrir Bournemouth sem er án sigurs í síðustu fjórum deildarleikjum og er nú í 9. sæti með 19 stig, en Sunderland í 4. sæti með 22 stig, sjö stigum frá toppnum.

Manchester City 3 - 2 Leeds
1-0 Phil Foden ('1 )
2-0 Josko Gvardiol ('25 )
2-1 Dominic Calvert-Lewin ('49 )
2-2 Lukas Nmecha ('68 )
2-2 Lukas Nmecha ('68 , Misnotað víti)
3-2 Phil Foden ('90 )

Brentford 3 - 1 Burnley
1-0 Igor Thiago ('81 , víti)
1-1 Zian Flemming ('85 , víti)
2-1 Igor Thiago ('86 )
3-1 Dango Ouattara ('90 )

Sunderland 3 - 2 Bournemouth
0-1 Amine Adli ('7 )
0-2 Tyler Adams ('15 )
1-2 Enzo Le Fee ('30 , víti)
2-2 Bertrand Traore ('46 )
3-2 Brian Brobbey ('69 )
Rautt spjald: Lewis Cook, Bournemouth ('90)