Notthingam Forest er að fylgjast náið með sænska markverðinum Jacob Widell Zetterström hjá Derby County í Championship deildinni.
Zetterström er lykilmaður hjá Derby og eru ýmis úrvalsdeildarfélög áhugasöm um hann. Hann var meðal annars orðaður við Brentford síðasta sumar og er með eitt og hálft ár eftir af samningi hjá Derby.
Zetterström er 27 ára gamall og er að íhuga samningstilboð frá Derby. Hann hefur verið á Englandi í eitt og hálft ár eftir að Derby keypti hann úr röðum Djurgården í ágúst í fyrra.
Hann er að berjast um byrjunarliðssætið á milli stanga sænska landsliðsins og kom til greina í vali á besta leikmanni Championship deildarinnar í október, en stóð þó ekki uppi sem sigurvegari.
Zetterström spilaði sinn fyrsta landsleik gegn Íslandi 2023 en þar var um vináttulandsleik að ræða. Hann fékk svo á dögunum frumraun sína í keppnisleik með Svíum undir stjórn Graham Potter, lokatölur 1-1 gegn Slóveníu.
Matz Sels er aðalmarkvörður Forest sem stendur og ver Brasilíumaðurinn John Victor mark liðsins í bikarkeppnum og Evrópu.
Sels átti magnað tímabil á síðustu leiktíð en hefur ekki þótt nægilega góður á upphafi nýs tímabils.
Athugasemdir
