Sergio Ramos
Spænski varnarmaðurinn Sergio Ramos, sem er af mörgum talinn einn allra besti miðvörður sögunnar, mun yfirgefa mexíkóska félagið Monterrey þegar samningur hans rennur út um áramótin.
Ramos, sem er 39 ára gamall, gerði eins árs samning við Monterrey í byrjun ársins.
Hann spilaði 21 leik og skoraði þrjú mörk er liðið hafnaði í 5. sæti deildarinnar.
Það tryggði Monterrey inn í umspilið, en liðið er með annan fótinn í undanúrslitum úrslitakeppninnar eftir að hafa unnið Club America, 2-0, í fyrri leik liðanna í 8-liða úrslitum.
Úrslitakeppnin klárast í næsta mánuði og rennur samningur Ramos í kjölfarið út, en það hefur verið staðfest að hann muni ekki framlengja við félagið.
Fabrizio Romano segir á X að Ramos sé ekki að hugsa um að hætta í fótbolta og hann sé klár í að minnsta kosti eitt ævintýri áður en hann ákveður að kalla þetta gott.
Ramos er einn mest skreyttasti leikmaður í fótboltasögunni. Hann myndaði saman frábær miðvarðateymi með Pepe og síðar Raphael Varane hjá Real Madrid. Alls hefur hann unnið 25 titla með Madrid og PSG ásamt því að hafa unnið EM tvisvar og HM einu sinni með spænska landsliðinu.
Athugasemdir
