Sóknarmaðurinn Emil Atlason skoraði tvö kærkomin mörk þegar Þróttur vann 6-1 sigur í 14. umferð Inkasso-deildarinnar. Hann er leikmaður umferðarinnar.

Emil segir að það geri ansi mikið fyrir sig persónulega að hafa skorað þessi fyrstu mörk sín í sumar. Hann fótbrotnaði í leik í Pepsi-deildinni 2016 og sleit krossband snemma tímabils í fyrra.

„Það var frábært fyrir mig að ná þessum mörkum. Ég hef lent í erfiðum meiðslum tvö mörk í röð og er mjög sáttur með að ná að skora þessi mörk. Ég er komast á gott ról. Þetta er mjög mikilvægt fyrir mig sem leikmann eftir það sem á undan er gengið, fá sjálfstraustið aftur," segir Emil.

Komu upp tímar í þessu meiðslaferli þar sem hann var í einhverju svartholi og hugsaði um hvort hann myndi snúa aftur á fótboltavöllinn?

„Þegar maður lendir í svona, sérstaklega til að byrja með, þá kemur upp þunglyndi í manni. Það stóð samt stutt yfir. Þegar ég hugsa til baka þá var aldrei séns að ég væri að fara að hætta í fótbolta. Ég hélt áfram."

Emil er af mikilli fótboltafjölskyldu og segist hafa fengið mjög góðan stuðning.

„Þau hafa stutt mig mjög mikið. Þau hafa öll lent í meiðslum eða erfiðum köflum á sínum ferli. Þau þekkja þetta líka. Þau hafa verið mér til staðar og hjálpað mikið."