„Þetta svipaði til undanúrslitanna í fyrra, þvílík vinna og þvílík spenna. Bara geðveikt að vinna eins sterkt lið og Valur er,'' sagði Hallgrímur Mar Steingrímsson, leikmaður KA, eftir 3-2 sigur á Val í undanúrslitum Mjólkurbikars karla í kvöld. Hallgrímur skoraði í leiknum, spilaði bróðurpartinn af honum meiddur en gaf sig allan í verkefnið - og hefði líklega átt að gefa KA fólki tækifæri á að anda léttar á lokamínútum leiksins, en hinum sparkvissa Grímsa brást bogalistin í tvígang.
Lestu um leikinn: KA 3 - 2 Valur
Hvernig er standið á þér?
„Mér er illt í höndinni og í hásininni, en mér er sama núna. Það verður ekki gaman að vakna á morgun samt!''
Í seinni hálfleik fékk KA liðið þónokkur tækifæri til að auka forystu sína þegar að Valsarar freistuðu þess að jafna leikinn. Hallgrímur segir að hann eigi líklega eftir að svekkja sig á sínum klúðrum í nokkra daga.
„Þegar að fór að líða leikinn þá fóru þeir að stíga framar, þá voru þeir opnari þegar við vorum að vinna boltann - sem að varð til þess að við fengum færi.''
Hann hélt áfram:
„Meðal annars ég. Ég fékk tvö dauðafæri, sem ég bara að skora. Ég á eftir að pirra mig í nokkra daga á þessu. Þetta er bara eins og að klúðra víti eins og færið mitt þarna í lokin.''
Hvað fer í gegnum hausinn á mönnum þegar að svona færi fara forgörðum?
„Ég veit það ekki. Ég hugsaði bara plís ekki skora! Ég veit ekki af hverju ég er að reyna að setja hann svona utarlega í hornið. Frederik er farinn í hitt hornið og ég hefði nánast getað sett hann á mitt markið, en það skiptir ekki máli. Við erum komnir í úrslitin,'' sagði kampakátur Hallgrímur.
KA menn eru komnir í bikarúrslitaleikinn annað árið í röð. Síðast þurftu þeir að sætta sig við silfrið gegn frábæru Víkingsliði. Nú hljóta menn að vilja bikarinn norður.
„Við vorum nálægt þessu í fyrra. Mér fannst leikurinn vera 50/50 þó að Víkingarnir hafi unnið okkur 3-1, þá áttum við séns. Vonandi mætum við þeim bara aftur og við ætlum að taka þá núna,'' sagði Hallgrímur.
Viðtalið má sjá í heild sinni í spilaranum hér að ofan.
