BBC fjallar um endurkomu Guðjohnsen á Brúna

„Gudjohnsens back at Stamford Bridge and ready to beat Chelsea“ er fyrirsögn á grein sem birt er á BBC þar sem fjallað er um komu Andra á völlinn þar sem pabbi hans hjálpaði Chelsea að tryggja sér sinn fyrsta Englandsmeistaratitil í 50 ár.

Með greininni er mynd af Andra Lucasi fjögurra ára gömlum í faðmi föður síns að fagna Englandsmeistaratitli Chelsea 2005.

Andri sagði í viðtali við Fótbolta.net í síðasta mánuði að það væri svo sannarlega sérstök tilfinning að vera að fara að spila gegn Chelsea á Stamford Bridge.

„Það er pínu öðruvísi. Pabbi spilaði í mörg ár með Chelsea og er mjög stór þar, ég fæddist líka þar þegar hann var að spila þar. Þetta er sérstakt. Eins og ég segi þá getur fótboltinn verið geggjaður og þetta er dæmi um það. Þetta er leikur sem maður vill spila, ég er viss um að þetta verði frábær upplifun," sagði Andri Lucas.

Í grein BBC er að sjálfsögðu einnig fjallað um bræður Andra og afa hans, Arnór Guðjohnsen, sem er goðsögn hjá Anderlecht.