Marko Arnautovic í baráttunni við Danilo
Marko Arnautovic, sem var keyptur til West Ham frá Stoke í sumar fyrir vænlega upphæð, býst ekki við því að koma í frí til Íslands vegna kulda en er þó ánægður með undirbúningstímabilið hjá félaginu.
Lestu um leikinn: Manchester City 3 - 0 West Ham
Arnautovic hefur verið einn af betri mönnum ensku úrvalsdeildarinnar síðustu ár en hann samdi við West Ham í sumar og var í byrjunarliðinu í dag.
Hann telur þetta hafa verið gott próf að spila gegn Manchester City á Laugardalsvelli.
„Þetta var gott próf. Við vitum að Manchester City er eitt af stærstu liðum Evrópu og við vitum hvað þeir geta og þeir halda bolta og stjórna honum. Það er gott fyrir okkur að reyna að ná okkur í form fyrir fyrsta leik í deildinni gegn Manchester United," sagði Marko Arnautovic.
„Ég var bara að flytja til London. Ég var í Þýskalandi á undirbúningstímabilinu en þetta verður eins og í Manchester, ég mun búa með fjölskyldunni og einbeita mér að fótboltanum sem er mikilvægast."
Hann telur að West Ham eigi góða möguleika á að enda ofarlega í ensku úrvalsdeildinni í vetur.
„Já, klárlega. Það eru smávægileg meiðsli á hópnum en við eigum góða möguleika í deildinni. Við þurfum að bæta okkur og leggja hart að okkur og einbeita okkur að leiknum gegn United."
Arnautovic var að koma í fyrsta skiptið til Íslands en hann býst þó ekki við því að koma hingað í frí, það sé hreinlega of kalt hérna og er hann meira fyrir að baða sig á sólarströndum.
„Þetta var svolítið skrítið fyrir mig að spila á Íslandi. Ég hef aldrei komið hingað en hef heyrt að það sé frábært að skoða ýmsa staði hér á Íslandi. Fólkið hefur verið mjög indælt við okkur og allir hafa áhuga á fótboltanum hérna og ég er ánægður að koma hingað alla vega einu sinni og sjá lífið með öðrum augum."
„Ég veit það ekki. Ég held að það sé of kalt hérna til þess að fara í frí, frekar fer maður í sólina en með landsliði auðvitað," sagði hann í lokin.
Athugasemdir
