Daniel Levy.
Frá mótmælum stuðningsmanna Tottenham í fyrra.
Daniel Levy stjórnarformaður Tottenham hefur óvænt sagt af sér eftir 24 ár við stjórnvöl félagsins.
Peter Charrington, stjórnarmaður hjá eigendum Tottenham, tekur við sem óháður stjórnarformaður, en Vinai Venkatesham verður framkvæmdarstjóri. Engar breytingar verða á eignarhaldi félagsins.
Í yfirlýsingu sagðist Levy vera afar stoltur af uppbyggingunni á félaginu og þakkaði stuðningsmönnum, leikmönnum og starfsfólki stuðninginn í gegnum tíðina.
Stuðningsmenn Tottenham hafa lengi átt í deilum við Levy. Hann hefur sætt mikillar gagnrýni vegna varfærni hans á leikmannamarkaðnum og margir stuðningsmenn liðsins óskað eftir að hann myndi segja af sér.
Fjöldi mótmæla beindust að Levy á síðasta tímabili. Þá sáust borðar á heimaleikjum liðsins með skilaboðum á borð við: „Leikurinn okkar snýst um heiður, leikur Levy um græðgi“ og „24 ár, 16 þjálfarar, 1 titill – kominn tími á breytingar“.
Levy tók við embætti stjórnarformanns í mars 2001 og hefur gengt starfi stjórnarformanns lengst allra í ensku úrvalsdeildinni.
Athugasemdir
