Það ríkir gríðarleg spenna í nokkuð jafnri 4. deild í ár, þar sem toppliðin tvö mættu bæði til leiks í gærkvöldi en tókst ekki að bera sigur úr býtum.
KÁ trónir á toppi deildarinnar með 21 stig úr 9 umferðum og +21 í markatölu. Hafnfirðingar heimsóttu Vængi Júpíters í gær en tókst ekki að sigra.
Lokatölur urðu 3-3 í gríðarlega skemmtilegum slag þar sem liðin skiptust á að skora. Vængirnir tóku forystuna í tvígang en KÁ komst yfir á lokamínútunum, áður en Bjarni Fannar Arnþórsson jafnaði fyrir heimamenn í uppbótartíma. Vængir Júpíters eru um miðja deild með 13 stig eftir jöfnunarmarkið.
KH er í öðru sæti, einu stigi á eftir KÁ eftir að hafa gert óvænt jafntefli á heimavelli gegn Kríu. Patrik Írisarson Santos skoraði fyrsta markið snemma leiks en Viðar Þór Sigurðsson jafnaði fyrir Seltirninga með marki úr vítaspyrnu á lokakaflanum.
Kría er um miðja deild eftir jafnteflið með 12 stig.
Að lokum sigruðu Hafnir botnslaginn gegn Hamri í Hveragerði.
Ingimar Þorvaldsson tók forystuna fyrir Hvergerðinga sem leiddu 1-0 í leikhlé, en staðan snerist við í síðari hálfleik. Hafnir komu til baka með tveimur mörkum svo lokatölur urðu 1-2.
Til gamans má geta að Pétur Georg Markan, 44 ára bæjarstjóri Hveragerðis, var á bekknum í dag og fékk að spila síðustu mínúturnar í tapinu.
Pétur Georg á farsælan feril að baki í íslenska boltanum en þetta er fyrsti leikur sem hann tekur þátt í síðan hann kom við sögu í nokkrum leikjum með Herði Ísafirði á árunum 2014 til 2018.
Hamar er aðeins með eitt stig á botni deildarinnar og þarf að girða sig í brók til að eiga möguleika á að forðast fall. Á meðan eru Hafnir í næstneðsta sæti með 9 stig eftir jafnmargar umferðir - einu stigi frá öruggu sæti í deildinni.
Vængir Júpiters 3 - 3 KÁ
1-0 Jónas Breki Svavarsson ('4 )
1-1 Brynjar Bjarkason ('14 )
2-1 Aron Sölvi Róbertsson ('28 )
2-2 Arnór Pálmi Kristjánsson ('33 )
2-3 Bjarki Sigurjónsson ('85 )
3-3 Bjarki Fannar Arnþórsson ('92)
KH 1 - 1 Kría
1-0 Patrik Írisarson Santos ('9 )
1-1 Viðar Þór Sigurðsson ('85 , Mark úr víti)
Rautt spjald: Birgir Ólafur Helgason , KH ('90)
Hamar 1 - 2 Hafnir
1-0 Ingimar Þorvaldsson ('27 )
1-1 Anton Freyr Hauks Guðlaugsson ('51 )
1-2 Tomas Adrian Alassia ('67 , Sjálfsmark)
4. deild karla
| Lið | L | U | J | T | Mörk | mun | Stig |
|---|---|---|---|---|---|---|---|
| 1. KÁ | 10 | 7 | 3 | 0 | 42 - 12 | +30 | 24 |
| 2. KH | 10 | 6 | 2 | 2 | 25 - 18 | +7 | 20 |
| 3. Árborg | 10 | 5 | 3 | 2 | 26 - 19 | +7 | 18 |
| 4. Elliði | 10 | 4 | 4 | 2 | 21 - 16 | +5 | 16 |
| 5. Vængir Júpiters | 10 | 4 | 4 | 2 | 19 - 16 | +3 | 16 |
| 6. Kría | 10 | 3 | 3 | 4 | 18 - 19 | -1 | 12 |
| 7. Hafnir | 10 | 4 | 0 | 6 | 24 - 31 | -7 | 12 |
| 8. Álftanes | 10 | 3 | 1 | 6 | 13 - 21 | -8 | 10 |
| 9. KFS | 10 | 3 | 1 | 6 | 17 - 40 | -23 | 10 |
| 10. Hamar | 10 | 0 | 1 | 9 | 10 - 23 | -13 | 1 |
Athugasemdir
