Alexandra var frábær á miðjunni hjá Blikum í kvöld og skoraði tvö mörk
„Við fáum svona smá tusku í andlitið í byrjun þegar þær sækja svolítið á okkur en svo sýndum við karakter. Fórum að stinga inn á þær og þá fóru færin að koma hjá okkur. Svo fáum við inn mark og þá fer sjálfstraustið upp og það er allt upp á við eftir það,“ sagði Alexandra Jóhannsdóttir, leikmaður Breiðabliks, eftir 4-0 sigur á Þrótti í 13. umferð Pepsi Max-deildarinnar í kvöld.
Lestu um leikinn: Þróttur R. 0 - 4 Breiðablik
Alexandra átti frábæran leik á miðjunni hjá Blikum, skoraði tvö mörk og var gríðarlega ákveðin og hugrökk í allri baráttu fyrir framan mark Þróttar. Er Alexandra alveg óttalaus?
„Ég myndi nú ekki segja það, en þú skorar ekki ef þú ert hræddur við boltann. Versta sem gæti gerst er að þú færð boltann í hausinn og það er allt í góðu,“ svaraði Alexandra létt.
Blikar fara með sigrinum upp í 30 stig og eiga leik til góða á topplið Vals sem er með stigi meira. Liðið tapaði sínum fyrstu stigum gegn Selfossi á dögunum og þurfti svo að sitja hjá í síðustu umferð þar sem leik liðsins gegn KR var frestað.
„Það var náttúrulega glatað að tapa þessum leik en við sýndum hér í dag að við eigum ekkert að vera að tapa leikjum. Við hugsum bara um okkur og það þýðir ekkert að pæla í því hvort við séum að elta eða hvort við séum fyrir ofan. Svo lengi sem við vinnum.“
Alexandra var að lokum spurð út í landsliðið en Jón Þór Hauksson mun tilkynna landsliðshóp fyrir leikina mikilvægu í undankeppni EM núna á miðvikudag. Hún vonast að sjálfsögðu til að vera í hópnum og segir marga liðsfélaga hennar úr Blikaliðinu einnig gera sterkt tilkall.
Þú getur horft á allt viðtalið við Alexöndru í spilaranum hér að ofan.
Athugasemdir
