Arnar Hallsson
„Mér fannst þetta nokkuð góður leikur frá okkar hendi og fannst mér við skapa okkur fullt af góðum stöðum en fannst við í fyrri hálfleik of fljótir að skjóta þegar við gátum spilað okkur í betri færi. “Voru orð Arnars Hallssonar þjálfara Njarðvíkur um leik sinna manna í dag í 2-1 tapi gegn ÍA í blíðskaparveðri á Akranesi fyrr í kvöld.
Lestu um leikinn: ÍA 2 - 1 Njarðvík
Njarðvík sem situr í ellefta og næst neðsta sæti deildarinnar sér fram á erfiðan seinni hluta mótsins. En finnst Arnari liðið vera að vaxa?
„Í þessum leik ætluðum við að skilgreina ákveðna viðspyrnu frá okkur og mér fannst hún greinileg. Ég merkti mikinn mun á liðinu og er ég ánægður með það. Það er alltaf fúlt að tapa fótboltaleikjum en mín skoðun er að við verðum soft eitt augnablik og gerum tvenn mistök í "sloppy" hreinsunum og þá fer þetta í tvö mörk. “
Arnar sagði á dögunum í viðtali við Fótbolta.net að
Rafael Victor væri á förum frá félaginu og væri það vegna þess að leikmaðurinn endurspeglaði ekki þau gildi sem liðið stæði fyrir. Rafael var ekki með gegn Leikni á dögunum en sneri aftur í lið Njarðvíkur í kvöld.
„Rafael er búinn að sýna frábært hugarfar frá því þetta gerist að ég segi þetta og tek hann út úr hóp. Hann er búinn að leggja mjög hart að sér á æfingum og hefur verið jákvæður og flottur á hverjum einasta degi og breytti skoðun minni með góðri frammistöðu á æfingum og framúrskarandi hugarfari.“
Marc McAusland var fjarverandi í leikmannahópi Njarðvíkur í kvöld og var fréttaritara ekki kunnugt um að hann væri að glíma við meiðsli. Um hans fjarveru sagði Arnar.
„Ég bara valdi hann ekki í dag. Hann fékk bara frí og ég vonast til þess að við sjáum hann í okkar röðum í næsta leik.“
Sagði Arnar en allt viðtalið við hann má sjá hér að ofan.
Athugasemdir
