Guðni Eiríksson, þjálfari FH, var hæstánægður með frammistöðu síns liðs í dag þegar liðið mætti í heimsókn til Fylkis í 7. umferð Bestu deildar kvenna.
Lestu um leikinn: Fylkir 0 - 3 FH
Ég er afar afar ánægður með frammistöðu liðsins hér í dag. Þrjú góð mörk og við höldum markinu okkar hreinu þannig ég gæti ekki verið sáttari.
FH byrjaði leikinn af miklum krafti og Fylkir var á afturfótunum strax á fyrstu mínútu leiksins.
„Ég er mjög ánægður með það hvernig við komum inn í leikinn. Eins og þú segir réttilega, við gáfum tóninn strax í byrjun. Undirbúningurinn var góður við vorum með ákveðin plön sem gengu upp. Við reyndum að sjá fyrir okkur leikinn aðeins fram í tímann. Reyndum að sjá hvað Fylkir myndi gera áður en leikurinn hófst og það gekk upp.“
Einungis sex leikmenn voru á bekk hjá FH í dag, aðspurður að því segir Guðni það ekki vera mikið áhyggjuefni
„Nei alls ekki. Við erum með leikmenn sem voru tæpir fyrir þennan leik og við gerum þá meðvituðu ákvörðun að hvíla þær algjörlega. Þær hefðu getað verið á bekk og komið inn á en það er mikið og þungt leikjaprógramm framundan. Næsti leikur á þriðjudag og svo aftur á laugardag þannig þetta eru þrír leikir á einni viku.“
Þar sem rúmlega þriðjungur af mótinu er búinn var Guðni beðinn um að leggja sitt mat á frammistöðu liðsins og stigasöfnunina hingað til.
„Kaflaskipt frammistaða. Byrjum ekkert sérstaklega vel, erum búin að vera koma okkur betur og betur inn í þetta. Það gerist með fleiri leikjum þegar leikmenn eru að spila saman í fyrsta sinn eru að ná taktinum og þetta tekur bara tíma. Þetta er allt saman eins og það á að vera. Mér finnst stígandi í liðinu klárlega. Við vorum í basli í upphafi móts að skora mörk, skapa okkur færi en það eru engir vankantar á því núna. Við erum búin að vera vaðandi í færum í síðustu leikjum og skorum tvö til þrjú mörk í hverjum einasta leik.“
Viðtalið má sjá í heild sinni í spilaranum hér að ofan.