Guðmundur Hreiðarsson á æfingunni í dag.
Gummi ræðir hér við markmenn íslenska landsliðsins.
Guðmundur Hreiðarsson, markmannsþjálfari íslenska landsliðsins hefur marga fjöruna sopið í gegnum tíðina. Nú er hann mættur með íslenska landsliðinu til Rússlands þar sem undirbúningur fyrir fyrsta leik gegn Argentínu á Heimsmeistaramótinu er í fullum gangi.
Hann viðurkennir að það hafi verið aðeins þungt yfir markmönnunum í byrjun æfingunnar en það hafi þó verið fljótt að breytast.
„Þetta var aðeins þungt yfir í byrjun æfingunnar. Þetta var eins og menn væru með bakpoka með einhverjum steinum í. Hannes (Þór Halldórsson) tók frumkvæðið síðan ákváðum við allir að losa þennan bakpoka og tæma hann og þá varð létt yfir öllum," sagði Guðmundur.
Í markmannshópnum eru þeir Hannes Þór Halldórsson, Frederik Schram og Rúnar Alex Rúnarsson. Þeir tveir síðastnefndu eru á sínu fyrsta stórmóti.
„Það hefur verið mjög gaman í þessum hópi en auðvitað er erfitt, kannski var einhver ferðaþreyta í mönnum. Þessi æfing var frábær og stundum þarf maður að létta á sér og við gerðum það saman allir fjórir og æfingin í framhaldinu var frábær."
Hannes Þór Halldórsson lék síðasta æfingaleik landsliðsins fyrir HM gegn Gana en hann var hvíldur í leiknum gegn Noregi.
„Hann er 100% klár. Við gerðum rétt með því að hvíla hann gegn Noregi og vera ekki að taka neina sénsa. Það hefði verið mjög óskynsamlegt. Maður hefði aldrei fyrirgefið sér það eftir á. Allir markmennirnir eru í toppstandi og Hannes hefur aldrei að mínu mati litið betur út."
Viðtalið í heild sinni við Guðmund er hægt að sjá í sjónvarpinu hér að ofan. Þar ræðir hann til að mynda um það hvernig hann og Frederik Schram tækluðu leikinn gegn Noregi þar sem Frederik Schram var mikið á milli tannanna á fólki eftir slæm mistök í markinu.
Athugasemdir
