Tapað leikjunum naumlega
Svartfellingar eru án stiga á botni riðilsins í Þjóðadeildinni en þeir töpuðu 2-0 gegn Íslandi á Laugardalsvelli í september. Orri Steinn Óskarsson og Jón Dagur Þorsteinsson skoruðu mörk Íslands. Síðan þá hefur liðið tapað hinum þremur leikjum sínum í riðlinum öllum með eins marks mun.

Í síðasta glugga tapaði Svartfjallaland báðum leikjum sínum, gegn Wales og Tyrklandi, 1-0 og alveg ljóst að markaskorun hefur verið hausverkur fyrir liðið. Nú er komið að lokaleikjunum í riðlinum og Svartfjallaland mun mæta Íslandi og Tyrklandi.

„Við förum inn í þessa leiki með það markmið að bæta frammistöðu okkar frá fyrri leikjum í keppninni. Það eru tveir ólíkir leikir sem bíða okkar, tvö lið með mjög ólíka leikstíla. Við erum ákveðnir í að klára þennan riðil á eins góðan hátt og mögulegt er," segir Prosinecki.

Fá ekki að spila í höfuðborginni
Leikur Svartfjallalands gegn Íslandi á laugardag verður spilaður í borginni Niksic en ekki í höfuðborginni Podgorica. Skoðun UEFA á þjóðarleikvangnum í Podgorica leiddi í ljós að vallarflöturinn sé ekki nægilega góður.

Heimaleikur Svartfellinga gegn Wales í september var einnig spilaður í Niksic þar sem völlurinn í Podgorica þótti óleikhæfur. Svartfellingar segja að talsverð bæting hafi orðið á vellinum síðan í september en þó ekki nægilega mikil að mati UEFA.

Það er um klukkutíma akstursfjarlægð frá Podgorica til Niksic. Leikvangurinn í Niksic tekur aðeins um 5 þúsund áhorfendur en þjóðarleikvangurinn tekur rúmlega tvöfalt fleiri.

Leikur Svartfjallalands og Íslands fer fram laugardaginn 16. nóvember. Svartfellingar eru á botni riðilsins en við Íslendingar erum í þriðja sæti, sem er umspilssæti um að halda sæti sínu í B-deildinni.

Landsliðshópur Svartfjallalands:

Markverðir: Milan Mijatovic (Buducnost), Danijel Petkovic (Liepaja), Igor Nikic (Decic), Balša Popovic (OFK Belgrad);

Varnarmenn: Adam Marušic (Lazio), Risto Radunovic (FCSB), Igor Vujacic (Rubin), Marko Vukcevic (Borac Banja Luka), Andrija Vukcevic (Cartagena), Nikola Šipcic (Cartagena), Marko Tuci (Gangwon);

Miðjumenn: Vladimir Jovovic (Sogdiana), Marko Jankovic (Karabakh), Marko Bakic (OFI), Driton Camaj (Kishvarda), Stefan Loncar (Akron), Edvin Kuch (Nefchi), Miloš Brnovic (Buducnost), Milan Vukotic (Buducnost;)

Sóknarmenn: Stevan Jovetic (Omonia), Stefan Mugoša (Inçon United), Nikola Krstovic (Lecce), Andrija Radulovic (Vojvodina).