Óskar Hrafn um Orra Stein: Þú ert á þeim stað sem þú átt skilið að vera

Hann vakti mikla athygli fyrir frammistöðu sína með FCK í Danmörku og var að lokum keyptur til Sociedad á lokadegi félagaskiptagluggans. Hann spilaði einn leik fyrir Sociedad fyrir landsleikjahlé.

Í landsleikjahléinu skoraði hann annað af mörkum Íslands í 2-0 sigri á Svartfjallalandi.

Fótbolti.net ræddi við Óskar Hrafn Þorvaldsson, föður Orra Steins, um uppganginn á Orra Steini undanfarið.

„Það er auðvitað sérstök tilfinning. Þú ert á þeim stað sem þú átt skilið að vera, hann er búinn að leggja sig fram og ganga í gegnum allan tilfinningaskalann hjá FCK. Hann er búinn að sýna mikla þrautseigju og dugnað. Ég er eins og mamma hans og öll fjölskyldan mjög stolt af honum," sagði Óskar Hrafn.