Það eru 15 aðalþjálfarar í 12 félögum Pepsi Max-deildar karla en allir voru þeir einhvern tímann fótboltamenn sjálfir.
Þjálfararnir áttu mjög mismunandi ferla og var það mjög mismunandi hversu langt þeir komust sem fótboltamenn. Hver af þeim átti farsælasta ferilinn sem leikmaður?
Undirritaður ákvað að skoða þetta og komst að niðurstöðu eftir mikla umhugsun enda ekki auðvelt verk. Þetta er huglægt mat byggt á því hversu langt menn náðu á leikmannaferlinum. Styrkur deilda, leikjafjöldi, landsleikir, titlar og fleira er tekið inn í jöfnuna.
Þetta er til gamans gert og ekki til að særa einn eða neinn. Bara svo það sé tekið fram.
Listann má skoða hér að neðan.
Hvernig er þinn 15 manna listi? Endilega segðu þína skoðun í ummælakerfinu að neðan.
Það styttist óðum í Pepsi Max-deildin en hún hefst 22. apríl næstkomandi.
15. Sigurður Heiðar Höskuldsson (Leiknir R.) - Er á leið í sitt fyrsta tímabil sem þjálfari í efstu deild en hann náði aldrei að spila þar sem leikmaður. Spilaði mest með ÍR, nágrönnum Leiknis, á sínum leikmannaferli. Var einnig hjá félögum á borð við Snæfell, ÍH, og Vængjum Júpiters.
14. Logi Ólafsson (FH) - Það er ekki hægt að finna miklar upplýsingar um leikmannaferil Loga inn á vefsíðu KSÍ en hann sagði aðeins frá honum í hlaðvarpsþættinum Draumaliðið. Hann ólst upp í Stjörnunni og FH, og byrjaði sem fremsti maður. Hann spilaði einnig sem varnarmaður síðar á ferlinum. Hann lék alltaf með FH í meistaraflokki og spilaði nokkra leiki með unglingalandsliðinu, en aldrei með A-landsliðinu. Skórnir fóru upp á hillu 1981 er hann fór þá í háskóla í Noregi.
13. Rúnar Páll Sigmundsson (Stjarnan) - Stjörnumaður í gegn. Þar spilaði hann mest á ferlinum en félagið flakkaði þá mikið á milli efstu deildar og næst efstu deildar. Rúnar spilaði einnig með Fram og HK á Íslandi, og Sogndal í Noregi. Spilaði á miðjunni og lék hann alls 16 unglingalandsleiki að því er kemur fram á vefsíðu KSÍ.
12. Eysteinn Hauksson (Keflavík) - Var varnar- og miðjumaður sem spilaði lengi vel á suðurnesjum; með Keflavík fyrri hluta ferilsins og Grindavík seinni hlutann, með stuttu stoppi í Njarðvík og Hong Kong. Spilaði langstærstan hluta ferilsins í efstu deild og á skráða sjö leiki með U19 landsliðinu.
11. Óskar Hrafn Þorvaldsson (Breiðablik) - Var mjög efnilegur varnarmaður og byrjaði á 18. aldursári að spila með meistaraflokki KR. Fór til Stromsgödset í Noregi og spilaði þrjá A-landsleiki en þurfti að hætta 25 ára vegna bakmeiðsla.
10. Sigurður Ragnar Eyjólfsson (Keflavík) - Sóknarmaður sem byrjaði meistaraflokks ferilinn í KR. Raðaði inn mörkunum í háskólaboltanum í Bandaríkjunum og árið 1999, eftir fínt ár með ÍA, fór hann til Walsall í ensku B-deildinni. Hann spilaði einnig með Chester City í Englandi og KRC Harelbeke áður en hann sneri aftur heim. Spilaði unglingalandsleiki fyrir U19 landsliðið.
9. Ólafur Stígsson (Fylkir) - Var öflugur miðjumaður og mikill félagsmaður í Fylki. Lék meira en 200 leiki fyrir Fylki á sínum ferli, en auk þess spilaði hann með Val hér á landi. Hann spilaði einnig í atvinnumennsku með East Fife í Skotlandi og með Molde í Noregi. Hann lék þá níu A-landsleiki, þar á meðal einn í undankeppni EM 2004.
8. Atli Sveinn Þórarinsson (Fylkir) - Næstur í röðinni er hinn Fylkisþjálfarinn, Atli Sveinn. Harðjaxl í hjarta varnarinnar sem spilaði með KA og Val hér á landi, og Örgryte í Svíþjóð. Hann varð Íslandsmeistari með Val 2007 og lék níu A-landsleiki fyrir Ísland.
7. Heimir Guðjónsson (Valur) - Magnaður þjálfari og var stórkostlegur leiðtogi á miðjunni sem leikmaður. Honum leið vel hér heima og fór aldrei erlendis í atvinnumennsku. Hann náði miklum árangri hér heima þar sem hann spilaði með KR, KA, ÍA og FH. Varð tvisvar Íslandsmeistari - sem fyrirliði - með FH og tvisvar bikarmeistari með KR.
6. Arnar Grétarsson (KA) - Enn einn miðjumaðurinn á þessum lista. Ólst upp í Breiðablik en spilaði einnig með Leiftri áður en hann hélt út í atvinnumennsku. Var fyrst um sinn hjá AEK Aþenu í Grikklandi og fór svo til Lokeren í Belgíu sem var mikið Íslendingalið á sínum tíma. Endaði svo ferilinn þar sem hann byrjaði; í Breiðablik. Spilaði 71 A-landsleik fyrir Ísland og skoraði tvö mörk.
5. Jóhannes Karl Guðjónsson (ÍA) - Jóhannes Karl var frábær miðjumaður sem fór snemma í atvinnumennsku. Hann spilaði meðal annars í ensku úrvalsdeildinni, spænsku úrvalsdeildinni og hollensku úrvalsdeildinni. Hann kom víða við erlendis og spilaði í sterkum deildum í Evrópu. Hann lék 34 A-landsleiki fyrir Ísland.
4. Þorvaldur Örlygsson (Stjarnan) - Miðjumaður sem fór frá KA til Nottingham Forest árið 1989. Hann spilaði þar undir stjórn goðsagnakennda þjálfarans Brian Clough. Varð fyrsti íslenski leikmaðurinn til að skora í efstu deild á Englandi, en hann spilaði einnig fyrir Stoke og Oldham á Englandi. Varð Íslandsmeistari með KA 1989 og spilaði 41 A-landsleik fyrir Ísland ásamt því að skora sjö landsliðsmörk.
3. Arnar Gunnlaugsson (Víkingur R.) - Þá er það topp þrír. Það sást fljótt að þarna var á ferðinni einn rosalega hæfileikaríkur leikmaður. Skoraði 15 mörk í 18 leikjum á 19. aldursári er hann lék með ÍA. Hann varð Íslandsmeistari það ár og fór út í atvinnumennsku til Feyenoord í Hollandi. Hann sneri aftur heim 1995 og skoraði þá 15 mörk í sjö leikjum er ÍA varð Íslandsmeistari. Svo hélt hann til Englands og spilaði bæði í ensku úrvalsdeildinni með Bolton og Leicester. Var gríðarlega hæfileikaríkur leikmaður en meiðsli settu oft strik í reikninginn hjá honum. Spilaði 32 A-landsleiki og skoraði í þeim þrjú mörk. Vann þrjá Íslandsmeistaratitla og tvo bikarmeistaratitla hér á Íslandi.
2. Rúnar Kristinsson (KR) - Í öðru sæti er leikjahæsti landsliðsmaður sögunnar. Hann er elskaður af stuðningsmönnum Lilleström og Lokeren, eftir að hafa spilað þar lengi og vel. Hann spilaði lengi í Belgíu með Lokeren og lék 104 landsleiki fyrir Ísland. Það er gríðarlegt afrek enda er það leikjamet sem stendur enn. Miðjumaður sem var hægt að treysta á.
1. Brynjar Björn Gunnarsson (HK) - Á toppnum á þessum lista er þjálfari HK-inga. Brynjar er leikjahæstur af þjálfurum deildarinnar í ensku úrvalsdeildinni þar sem hann spilaði nokkuð stóra rullu fyrir Reading í tvö tímabil í deild þeirra bestu á Englandi. Hann lék einnig með Stoke, Nottingham Forest og Watford í Englandi, og náði að skapa sér ágætis nafn þar í landi. Áður en hann hélt til Englands spilaði hann í Noregi og Svíþjóð, og auðvitað með KR. Hann endaði ferilinn á því að verða Íslandsmeistari í KR. Hann spilaði 74 A-landsleiki og skoraði fimm mörk.
Athugasemdir
