Lestu um leikinn: Vllaznia 2 -  1 Víkingur R.

Víkingur R. heimsótti Vllaznia til Albaníu í Sambandsdeildinni í kvöld og byrjuðu gestirnir úr Fossvoginum talsvert betur. Nikolaj Hansen fékk gott færi snemma leiks en skallaði beint á markvörð Vllaznia. Skömmu síðar leit fyrsta markið dagsins ljós.

Karl Friðleifur Gunnarsson skallaði þá hornspyrnu frá Gylfa Þór Sigurðssyni í netið til að taka forystuna.

Víkingur var sterkari aðilinn í fyrri hálfleik og komst Valdimar Þór Ingimundarson nálægt því að tvöfalda forystuna eftir skyndisókn, en skot hans endaði framhjá markinu. Staðan var því 0-1 fyrir Víking í hálfleik.

Helgi Guðjónsson hæfði slána með frábæru skoti utan teigs í upphafi síðari hálfleiks en Albanirnir tóku völdin á vellinum eftir þetta.

Þeir ógnuðu og ógnuðu þar til Melos Bajrami jafnaði metin með skalla eftir hornspyrnu á 67. mínútu.

Víkingar tóku að sækja meira eftir þetta en gáfu færi á sér. Vllaznia keyrði upp í tvær skyndisóknir og skoraði úr einni þeirra þegar leikmenn liðsins komust í góða stöðu þrír á þrjá. Esat Mala gerði allt sjálfur, rak boltann og kláraði svo með skoti sem fór af Oliver Ekroth og í netið.

Níu mínútum var bætt við venjulegan leiktíma en Víkingum tókst ekki að skora þrátt fyrir fína tilraun, svo lokatölur urðu 2-1 fyrir Vllaznia. Víkingar þurfa því sigur í seinni leiknum.

Sigurliðið úr einvíginu mætir annað hvort Bröndby eða HB Torshavn í næstu umferð. Bröndby er líklegri andstæðingurinn, enda eru Danirnir með eins marks forystu í fyrri leik liðanna í Færeyjum sem stendur.