Glódís með fyrirliðabandið á miðri mynd fagnar í leikslok
„Það er alveg hægt að segja það að þetta var gríðarlega sætt og maður var svona smá "emotional" eftir leik. Þetta skipti okkur gríðarlega miklu máli og mér fannst við sýna í dag að þetta væri það sem við virkilega vildum.“ Sagði fyrirliði Íslands Glódís Perla Viggósdóttir um tilfinninguna eftir 2-1 endurkomusigur Íslands á Serbíu á Kópavogsvelli í dag sem tryggði liðinu áframhaldandi dvöl í A-deild Þjóðardeildar UEFA.
Lestu um leikinn: Ísland 2 - 1 Serbía
Íslenska liðið lenti undir snemma leiks og var langt liðið á leikinn þegar Sveindís Jane Jónsdóttir jafnaði. Skömmu fyrir leikslok tryggði Bryndís Níelsdóttir Íslandi svo sigur. Hvað var það í augum Glódísar sem ýtti liðinu yfir þessa hindrun?
„Fyrst og fremst þolinmæði af okkar hálfu. Það var ekkert panik eða stress yfir því að þær skora svona snemma, frekar finnst mér við stíga upp eftir markið. Við förum að spila betur og fara betur með boltann og eiginlega tökum yfir leikinn. Mér fannst við því svara því gríðarlega vel og svo undir lokin eru þær orðnar gríðarlega þreyttar og þá náum við að nýta okkar styrkleika.“
Sigurinn tryggði eins og áður segir Íslandi áframhaldandi veru í A-deild og því ljóst að andstæðingar okkar í komandi undankeppni EM verða gríðarlega sterkir. Um komandi verkefni sagði Glódís.
„Við erum að fara að spila við gríðarlega sterkar þjóðir og það verður alveg áskorun. Þetta er ekki auðvelt verkefni að spila í A-deild en það er það sem við viljum. Við viljum máta okkur við þessi lið þótt við kannski áttum okkur á að við erum ekki þar akkúrat núna en það er þar sem við viljum vera. Við sem leikmenn, þjóðin og KSÍ þurfum öll að stíga upp ef við ætlum að vera í þessari baráttu því það er klárlega þar sem við viljum vera.“
Sagði Glódís en allt viðtalið við hana má sjá hér að ofan þar sem hún ræðir meðal annars aðstöðumál.
Athugasemdir
