Pétur Theódór gekk í raðir Breiðabliks frá Gróttu í lok tímabilsins 2021 en sleit krossband í hné á æfingu 1. nóvember sama ár og náði aðeins einum leik með liðinu á síðustu leiktíð - þegar hann kom inná í lokin gegn Val í 2-5 sigri 22. október.

Hann reif svo liðþófa í hné síðastliðinn nóvember en hefur verið að ná sér af þeim meiðslum.

Pétur Theódór, sem er 27 ára gamall, skoraði 23 mörk í 21 leik með Gróttu í Lengjudeildinni sumarið 2021 auk þriggja bikarmarka. Hann er uppalinn hjá Gróttu og hefur leikið þar mestallan sinn feril.

„Ég get ekki beðið eftir því að komast aftur á völlinn og hjálpa Gróttu að ná settum markmiðum. Chris og þjálfarateymið eru að gera mjög gott starf sem hefur ekki fengið næga athygli og ég hlakka til að taka þátt. Sjáumst á Vivaldi!" segir þessi öflugi sóknarmaður sem mun eflaust skora mikið í Lengjudeildinni í sumar.

Grótta hafnaði í þriðja sæti Lengjudeildarinnar á síðustu leiktíð en þetta er gríðarlegur liðsstyrkur fyrir félagið.