„Vá maður, þetta er geðveikt. Þetta gerist ekki sætara, að skora svona seint," sagði Viktor Jónsson framherji ÍA eftir 3 - 2 heimasigur á Val í Bestu-deildinni í kvöld.
Lestu um leikinn: ÍA 3 - 2 Valur
„Mér fannst við eiga skilið að skora eitt mark í viðbót, búnir að fá góðar stöður og góð færi. Sem betur fer, guði sé lof, skoraði Steinar þarna í lokin," hélt hann áfram.
„Mér fannst leikurinn vel spilaður af okkar hálfu fyrir utan fyrstu 15 mínúturnar. Þá vorum við í smá brasi. Svo fannst mér við ná tökum á þessu og vorum ótrúlega duglegir í dag. Við vorum mjög öflugir að halda boltanum en þeir sömuleiðis. Við vorum duglegir að vinna til baka og mér fannst við spila þennan leik frábærlega."
Þegar tíu mínútur voru eftir af leiknum kallaði Jón Þór Hauksson þjálfari ÍA í Viktor og Hinrik Harðarson hinn framherjann í liðinu og tók stuttan fund með þeim. Hvað var rætt þar?
„Við vorum aðeins að fara yfir hvernig við gætum pressað þá betur, lokað á þá og stýrt þeim betur. Það lagaðist líka margt við það," sagði Viktor en var það lykill að sigrinum?
„Nei svosem ekki. Við vorum búnir að leggja grunninn að þessum leik og fylgdum því plani. Það vantaði kannski meiri ákefð í pressuna hjá okkur. Að vera óhræddir að stíga upp í þá."
Báruð þið of mikla virðingu fyrir þeim?
„Það var pínu hræðsla. Við vildum alls ekki missa þetta niður og um leið og við syncuðum betur í pressunni gekk þetta mikið betur síðustu 15-20."
Viktor fékk boltann í teignum undir lokin og valdi að gefa út úr teignum á Steinar Þorsteinsson sem skoraði gull af marki.
„Það var geðveik, loksins skorar hann líka. Það var mjög gott að fá hann á blað og fínt fyrir mig að borga aðeins til baka fyrir allar stoðsendingarnar frá honum. Þetta var ekki alveg að detta hjá mér í dag en ég fékk þó færi til þess. Það er gott að geta lagt upp líka og borgað stráknum til baka."
Nánar er rætt við Viktor í spilaranum að ofan en hann ræðir meðal annars um afmælisveisluna sína á Kópavogsvelli í síðasta leik.
Athugasemdir
