Ekki er það vegna þess að verðmæti Viðars hefur eitthvað minnkað. Menn hafa bara svo mikið fé milli handanna að þeir geta leikið sér án þess að högg sjáist á vatni.

Kína er næst stærsta hagkerfi heims en hefur aldrei verið þekkt fyrir fótboltaafrek. Reyndar hefur landslið þjóðarinnar aðeins einu sinni komist í lokakeppni HM. En skyndilega hefur mikill áhugi myndast og styttist í að við getum notað orðið fótboltafár.

Allir eru búnir að hoppa á vagninn. Meira að segja forsetinn Xi Jinping hefur lýst yfir aðdáun sinni á vinsælustu íþrótt heims. Hann heldur með Manchester United. Áhorfendatölur eru á uppleið, launin eru á mikilli uppleið og fyrirtæki í Kína eru í auknum mæli farin að setja pening í fótboltann.

Þekkt nöfn flykkjast í deildina og gerir því eftirsóknarverðara fyrir önnur þekkt nöfn að fara sömu leið. Fjárhagsstyrkur og fólksfjöldinn í Kína gerir það að verkum að fótboltinn er orðinn risastórt viðskiptaferlíki í landinu.

Sambataktar í Kína
Brasilíumenn hafa oftast allra unnið HM í fótbolta. Það vantar ekki brasilískar tengingar í kínversku deildina. Ramires er á leiðinni frá Chelsea til Jiangsu Suning og Paulinho, fyrrum leikmaður Tottenham, spilar með Guangzhou Evergrande. Robinho lék einmitt með liðinu í fyrra en þjálfari þess er Luiz Felipe Scolari sem gerði Brasilíu að heimsmeisturum 2002.

Síðustu þrír þjálfarar Guangzhou Evergrande hafa allir orðið heimsmeistarar því á undan Scolari héldu Marcello Lippi og síðar Fabio Cannavaro um stjórnartaumana.

Svíinn síkáti, glaumgosinn Sven-Göran Eriksson, er þjálfari Shanghai SIPG en í sínum röðum hefur hann einn launahæsta leikmann heims, Asamoah Gyan. Ronaldo og Messi eru aðeins tveir af fáum leikmönnum sem eru á hærri launum en Gyan.

„Meðan ég hef verið hér hefur fótboltinn stækkað gríðarlega, mun meira en ég hefði getað ímyndað mér. Á næstu árum tel ég að hann geti orðið gríðarstór," segir Eriksson sem hefur ekki farið leynt með áhuga sinn á að fá Wayne Rooney til Kína. Það kæmi manni ekki á óvart að sjá Rooney spila í kínversku deildinni bráðlega.

Herferð gegn veðmálasvindli stór hluti af uppganginum
Kínverska Ofurdeildin, eins og hún er kölluð, var sett á laggirnar 2004 þegar yfirmenn knattspyrnusambands landsins ákváðu að breytinga væri þörf á deildarfyrirkomulaginu. Athyglisvert er að upphafið af vinsældum deildarinnar má rekja til herferðar kínverskra stjórnvalda.

Yfirvöld í Kína ákváðu að skera upp herör gegn svindli og svínaríi. Veðmálaheimurinn var tekinn í gegn og hart tekið á hagræðingu úrslita og spillingu. Eitthvað sem var stórt vandamál í landinu. Þrír fyrrum formenn knattspyrnusambands landsins, Xie Yalong, Nan Yong og Yang Yimin voru handteknir.

Eftir þessa „hreingerningu" jókst áhugi almennings á deildinni greinilega árið 2011 og árið þar á eftir fóru hjólin að snúast. Didier Drogba og Nicolas Anelka voru meðal þekktra nafna sem keypt voru í deildina.

Uppruni fótboltans er í Kína
Smá útúrdúr, en samt ekki: Það er umdeilanlegt hver fæðingarstaður fótboltans er. Í núverandi mynd er oft talað um England í þessari umræðu en sögufræðingar segja að uppruni leiksins eigi rætur í Kína. Fyrir 2.000 árum var til leikur í Kína sem kallaðist sparkbolti eða „cuju".

Hægt var að spila leikinn í mismunandi útgáfum. Ein útgáfan snérist um að halda boltanum uppi í loftinu sem lengst en önnur var sú að tvö lið áttust við og reyndu að koma boltanum í mark sem var tíu metra hátt. Keppendurnir voru oftast ungir karlmenn úr efnamiklum fjölskyldum.

Liðið sem vann var verðlaunað með trommuslætti, fánum og víni. Leikurinn snérist á engan hátt um peninga eða frægð og frama heldur var aðeins notaður sem dægrastytting.

Kína vill njóta farsældar í öllu
Fótboltabyltingin í Kína nær langt út fyrir landið. Horfum til Evrópu. Kínverskir fjárfestar hafa á undanförnum árum verið að eignast hlutabréf í fótboltafélögum á Englandi, Spáni Frakklandi, Hollandi og Tékklandi.

Ástæðan er að mörgu leyti þrjá þjóðarinnar til að gera sig gildandi í alþjóðlegum fótbolta, þróa félagsliðafótboltann í Kína og landslið þjóðarinnar, auka áhuga kínverskra stuðningsmanna og nota fótboltann til að auglýsa sig. Kína vill vera stórt og njóta farsældar í öllu sem þjóðin gerir og hingað til hefur fótboltinn setið á hakanum. Nú skal breyta því.

Kínverskir fjárfestar vilja fjölga leikmönnum frá landinu í Evrópufótboltanum og þeir vilja að hlutirnir gerist hratt.

Kínverskt lampafyrirtæki er orðið helsti styrktaraðili portúgölsku B-deildarinnar. Frá og með næsta tímabili heitir deildin Ledman deildin. Fyrirtækið hafði uppi hugmyndir um að senda tíu kínverska leikmenn til Portúgal og planta þeim í efstu liðin. Þessi brjálaða hugmynd fékk ekki góðar viðtökur í Portúgal og ákveðið var frá að hverfa.

Hvar endar þetta? Mun Kína einhvern tímann berjast um heimsmeistaratitilinn? Verður kínverski boltinn kominn á Stöð 2 Sport eftir nokkur ár? Verða næstu Messi og Ronaldo að spila í kínversku deildinni? Eða er þetta bara risablaðra sem springur einn daginn? Spurningarnar eru stórar og margar.