Hallbera og liðsfélagar í Val byrja Íslandsmótið af krafti
„Við vorum mjög vel stillar fyrir þennan leik og mér fannst við frábærar fyrstu 20 mínúturnar. Við vorum að skapa helling af færum. Síðan förum við einhvernveginn aftur í gamla farið og fáum á okkur tvö mörk. Við það riðlast aðeins leikurinn okkar en í hálfleik náum við að stilla okkur af og stundum þarf maður bara að blása smá sjálfstrausti í sjálfan sig. Það var bara eitt lið á vellinum í seinni hálfleik og það vorum við,“ sagði Hallbera Guðný Gísladóttir, vinstri bakvörður Vals, eftir stórsigur á Þór/KA í fyrstu umferð Pepsi Max-deildar kvenna.
Lestu um leikinn: Valur 5 - 2 Þór/KA
Lið Vals var gríðarlega öflugt í síðari hálfleik og Hallbera hrósaði liðsfélögum sínum fyrir góðan sóknarleik.
„Það var ógeðslega gaman að horfa á liðið mitt í dag. Við vorum að skapa helling af færum og vorum allar að vinna saman. Við náðum að vinna fyrir hvora aðra, ef ein gerði mistök þá var næsta mætt og þessi framlína hjá okkur er náttúrulega á öðru leveli. Þetta var bara geggjað.“
Framundan er hörkukeppni í góðri deild og Hallbera segir Valskonur tilbúnar í baráttuna.
„Við erum vel stemmdar á Hlíðarenda. Við ætlum ekkert að fara að ofpeppast eftir þennan leik en þetta var ógeðslega gaman og við ætlum að reyna að halda þessum takti áfram í sumar.“
Nánar er rætt við leikmanninn reynda í spilaranum hér að ofan.
Athugasemdir
