Eysteinn og Sigurður Ragnar gátu fagnað í dag.
„Bara gott að liðið sé aftur komið á sigurbraut eftir að hafa tapað 5 stigum í síðustu tveimur leikjum. Við tókum aðeins spjallið, fórum yfir hvernig við fórum útaf réttu brautinni,'' sagði Eysteinn Húni Hauksson, þjálfari Keflavíkur eftir 1-3 sigur á Þór í Lengjudeild karla í kvöld.
Lestu um leikinn: Þór 1 - 3 Keflavík
„Við byrjuðum leikinn ekkert sérstaklega vel og Sindri þarf að bjarga okkur óþarflega oft, hann á stórleik í dag. En síðan eftir að við jöfnum þá komumst við í góðan gír, erum með tök á leiknum og erum að klára með gæðum.''
Keflavík byrjaði leikinn illa og lentu undir þegar að Alvaro Montejo skoraði fyrir Þór. Þeir komu þó sterkir til baka og gerðu út um leikinn undir lok fyrri hálfleiks.
„Manni leist ekki alveg nógu vel á þetta í byrjun og mér fannst margt vera að í markinu sem Þór skoraði. Það voru blikur á lofti, en þá tóku strákarnir sig bara til og sáu um þetta sjálfir. Þeir rifu sig í gang og náðu að snúa þessu, það er frábært,'' sagði Eysteinn.
Joey Gibbs átti toppleik í dag og skoraði tvívegis fyrir Keflavík. Eysteinn ber honum vel söguna.
„Hann er bara maður sem kann fagið og við erum að reyna að fjölga þeim mönnum sem fara ekki bara inná og berjast, heldur kunna það sem þeir eru að gera og það er að koma smátt og smátt. Við sjáum fram á það að þegar við fáum svona menn eins og hann, að þá smitast það í aðra leikmenn.''
Keflavík komu sér í sterka stöðu með sigrinum í dag og sitja nú 2. sæti, fjórum stigum á eftir Fram og eiga leik til góða.
„Við erum ekki smeykir við eitt einasta lið hérna, þetta snýst bara um hvað þessir strákar ætla að gefa sér langan tíma í að vera klárir í þetta allt saman. Þegar baráttan er til staðar, þá er mjög erfitt að eiga við okkur og hún verður alltaf grunnurinn,'' sagði Eysteinn að lokum.
Viðtalið má sjá í heild sinni í spilaranum hér að ofan.
Athugasemdir
