„Ég er vonsvikinn því leikmennirnir gáfu allt sem þeir áttu. Mér fannst við stjórna leiknum og síðan gefum við þrjú mjög ódýr mörk. Hinsvegar skorum við tvö mjög góð mörk og við getum verið ánægð með það.“ sagði John Andrews, þjálfari Víkinga, eftir fyrsta tapleik Víkinga í deildinni.
Lestu um leikinn: Víkingur R. 2 - 3 Afturelding
Geturu tekið eitthvað jákvætt úr leiknum þrátt fyrir að hafa tapað?
„Auðvitað. Við gáfum allt í leikinn eins og alltaf. Það var gott að sjá Kolbrúnu koma inn á og Dagný að byrja. Bergdís kemur af bekknum og heldur áfram að skora, Sigdís skorar líka og við erum mjög ánægð með þær. En við gerum nokkur mistök í dag og það er erfitt að horfa upp á það þegar stelpurnar gáfu sig allar fram í dag.“
Þið voruð 2-1 undir í hálfleik og gerðuð þrefalda breytingu í kjölfarið, hver var hugsunin á bak við það?
„Við erum bara með mjög sterkan hóp. Við settum Lindu og ungu stelpurnar inn á til þess að koma með aðeins meiri orku inn í leikinn og það virtist hafa virkað. Við vorum ívið betri og áttum mörg skot og margar fyrirgjafir og leikurinn hefði alveg getað endað 3-3.“
Hvernig finnst þér tímabilið hafa farið af stað?
„Ég er mjög glaður. Við erum nokkrum stigum betri núna en við vorum á þessum tímapunkti í fyrra þannig auðvitað er maður sáttur. Síðan er ég mjög ánægður með framlag leikmanna í upphafi móts einnig. Leikmenn sem koma útaf eru brjálaðar og ég er mjög ánægður með það því það er bara mjög gott að mínu mati.“ sagði John Andrews, þjálfari Víkinga, eftir fyrsta tapleik í deildinni í ár.
Viðtalið má sjá í spilaranum hér að ofan.
