Lestu um leikinn: FH 3 -  1 Fylkir

FH fór til hálfleiks með eins marks forystu eftir að Breukelen Woodard hafði komið þeim yfir með góðu marki. Fylkisliðið átti þó sín upphlaup fram að hálfleik og komst nokkrum sinnum í góðar stöður. Það varð þó minna um það lengst af í síðari hálfleik. Hverju var breytt í hálfleik?

„Við breyttum svo sem ekki miklu. Við fórum aftur yfir hlutina sem við lögðum upp með. Vigdís (Edda Friðriksdóttir) kemur inn sínum fyrsta leik í sumar eftir langvarandi meiðsli og hennar framlag í dag skipti sköpum fyrir okkur. Það sem hún gaf okkur í seinni hálfleik var ákveðin fysík, hún er gríðarlega sterk í loftinu og Fylkir var að ógna okkur í föstum leikatriðum.“

FH á í harðri baráttu um sæti í efri hluta deildarinnar nú þegar tvær umferðir eru fram að skiptingu. Fjórða sætið er raunhæft markmið en hvert setur liðið sjálft stefnuna?

„Okkar markmið er að komast í topp sex. Það er, var og verður okkar markmið í sumar. Hvort það næst eða ekki það bara veit ég ekki. Þetta er keppni þriggja liða í dag myndi ég segja. FH, Stjörnunar og Þróttar og tvö af þessum liðum verða í topp sex en eitt þarf að sitja með sárt ennið í botn fjórum.“

Næst á dagskrá hjá FH er heimsókn til Keflavíkur þar sem liðið mætir liði Keflavíkur sem berst fyrir lífi sínu í deildinni. Um það verkefni sagði Guðni.

„Það er bara ótrúlega erfitt að fara suður með sjó og mæta Keflavík. Vonandi verður ekki rok. Þar munum við þurfa á toppleik að halda til að geta fengið eitthvað út úr þeim leik. Þær eru "physical" og sterkar og eru að bæta við sig leikmönnum. Þær eru að berjast fyrir tilverurétti sínum í deildinni og það er erfitt að mæta slíkum liðum.“

Sagði Guðni en allt viðtalið má sjá hér að ofan