Halldór Árnason, þjálfari Breiðabliks á hliðarlínunni í kvöld.
Gent skoraði jöfnunarmark úr vítaspyrnu.
„Frammistaðan var ótrúlega góð, fyrir utan örfá augnablik þar sem við sofum á verðinum. Þeir refsa fyrir það," sagði Halldór Árnason, þjálfari Breiðabliks, við Fótbolta.net eftir súrt 2-3 tap gegn Gent frá Belgíu í riðlakeppni Sambandsdeildarinnar í kvöld.
„Þetta var frammistaða sem verðskuldaði sigur, eða í það minnsta jafntefli."
„Þetta var frammistaða sem verðskuldaði sigur, eða í það minnsta jafntefli."
Á dögunum tapaði Breiðablik 5-0 fyrir Gent í Belgíu. Þetta var talsvert öðruvísi leikur.
„Við lögðum upp með að pressa þá hærra, setja meiri pressu á boltann. Við gerðum það á stórum köflum mjög vel. Þetta breyttist aðeins þegar við komumst í 2-1 og það var alls ekki planið að fara neðar. Við þurftum að 'grinda' út fyrri hálfleikinn. Svo vorum við algjörlega staðráðnir í því að byrja seinni hálfleikinn á pressu, að það væri leiðin á móti þeim."
Breiðablik lenti snemma undir en svaraði því með að komast í 2-1 fyrir leikhlé. Í seinni hálfleiknum fékk Gent heldur ódýra vítaspyrnu og jafnaði metin. Í kjölfarið kom sigurmarkið.
„Að þeir fái þessa gjöf í 2-2 markinu er í besta falli óþolandi, gríðarlega svekkjandi. Nokkrum sekúndum áður er Davíð Ingvars hamraður niður, bombað í sköflunginn á honum þegar hann stendur á marklínu að reyna að koma okkur í 3-1. Ég veit ekki hvort þeir hafi skoðað það einu sinni. Það er pjúra víti. Hitt, hann leggst í fangið á Andra og grýtir sér í jörðina. Það er töluvert minni snerting en oft í leiknum, nánast engin snerting. Því miður er þetta alltof stórt augnablik í leiknum," sagði Halldór en honum fannst leikplanið vera að ganga vel fram að þessu augnabliki. Blikar héldu áfram eftir að Gent komst yfir og hefðu hæglega getað jafnað.
Það var spilað á Laugardalsvelli í kvöld en það eru ekki oft leikir þar í nóvember. Vallarstarfsmenn gerðu ótrúlega vinnu að gera hann leikhæfan en hann var samt sem áður frosinn á ákveðnum stöðum þar sem það var mjög kalt í kvöld.
„Hann var vel frosinn á köntunum, eins og malbik. Hann var aðeins mýkri inn á miðjum vellinum. Adrenalínið og stemningin, andinn frá fólkinu okkar, var þannig að manni var ekkert kalt. Það var frábær stemning og mikið hrós fer til þeirra stuðningsmanna sem klæddu sig vel og studdu við bakið á okkur," sagði Dóri en hann hefur trú á því að liðið muni allavega ná í eitt stig áður en riðillinn klárast. Það eru tveir leikir eftir.
„Þetta er klárlega eitthvað til að byggja ofan á. Við ætlum okkur klárlega áfram hluti í þessum riðli."
Athugasemdir
