Lestu um leikinn: Kórdrengir 2 -  0 Vestri

„Í fyrri hálfleik fáum við urmul færa sem við nýttum ekki. Það er aldrei góðs viti að nýta ekki færin sín. Við gerum okkur seka um einbeitingarleysi og fáum á okkur víti og síðan annað markið úr föstu leikatriði."

„Maður verður að geta tekist á við það þegar maður lendir undir. Við höfum stundum gert það en ekki í þessum leik. Við áttum ekki góðan dag," sagði Heiðar Birnir en liðin voru jöfn af stigum með 16 stig fyrir leikinn í dag.

Getur verið að spennustigið hafi verið vanstillt hjá leikmönnum þar sem það var mikið í húfi?

„Allir leikir hjá okkur í sumar hafa verið úrslitaleikir þannig séð. Þetta eru reynslu miklir leikmenn og það var ekkert svoleiðis."

Eftir tapið í dag Vestri í 6. sæti deildarinnar sex stigum frá 2. sætinu.

„Ég er alls ekki ánægður með uppskeruna hingað til. Ef við hefðum unnið þennan leik þá værum við í fínum málum en núna er þetta svolítið önnur staða. Menn þurfa að gyrða sig í brók og gera betur. Það er ekkert öðruvísi," sagði Heiðar Birnir sem segir það þurfa að koma í ljós hvort Vestri bætir við sig mönnum í félagaskiptalugganum.