Myndir: Víkingur gerði jöfnunarmark á lokasekúndunni

Ótrúlegum 90 mínútum var að ljúka rétt í þessu þar sem Lech Poznan var með forystu stærstan hluta leiksins.

Pólverjarnir voru 2-0 yfir og fengu ógrynni dauðafæra í seinni hálfleik og hreinlega ótrúlegt að þeim hafi ekki tekist að gera út um viðureignina.

Lech Poznan átti að fá vítaspyrnu á lokakaflanum þegar Ingvar Jónsson braut einstaklega klaufalega af sér innan vítateigs en dómari leiksins, sem horfði á þetta gerast úr besta mögulega sjónarhorninu, ákvað að dæma ekki. Ótrúleg dómgæsla og heppileg fyrir Víkinga sem voru þó enn 2-0 undir í leiknum og 2-1 samanlagt í viðureigninni.

Það var á lokasekúndunni, þegar vonir Víkinga virtust orðnar að engu, sem varamaðurinn Danijel Dejan Djuric skoraði jöfnunarmark eftir flotta stoðsendingu frá Erlingi Agnarssyni sem hafði sloppið innfyrir vinstri bakvörð Poznan.