Lestu um leikinn: KR 0 -  1 Breiðablik

„Þetta er bara eins og þetta er, kalt og völlurinn erfiður, maður treystir boltanum minna og svo framvegis. Fótboltaleikir vinnast á marga mismunandi vegu og þá þarf maður að grafa djúpt í eitthvað annað og við gerðum það í dag."

Þykir gríðarlega vænt um KR
Arnór gekk í raðir uppeldisfélagsins Breiðabliks í vetur eftir sex tímabil hjá KR. Hvernig var að snúa aftur aftur á KR völlinn?

„Mér þykir gríðarlega vænt um KR og vænt um þennan völl, vænt um fólkið hérna. Mér var tekið gríðarlega vel hérna og það var rosalega góð tilfinning (að koma aftur). Mér líður vel hérna og mér leið vel í dag."

All-in eða ekki
Gísli Eyjólfsson skoraði sigurmarkið í dag. „Heldur betur ljúft, mér fannst við virkilega búnir að vinna fyrir þessu marki þannig það var extra mikill léttir að sjá hann í netinu."

Sigurinn var sá fjórði í röð hjá Blikum. „Mér finnst við eiga inni, en líst gríðarlega vel á þetta. Við höfum sýnt frábærar frammistöður, höfum sýnt ýmsar hliðar; erum aggressívir og pressum mikið. Við höfum fengið mörg mörk á okkur í nokkrum leikjum, það er bara all-in eða ekki. Við eigum inni ennþá en ég er ótrúlega ánægður með þá braut sem við erum á."

Arnór var að kljást við Kristin Jónsson, fyrrum liðsfélaga sinn hjá bæði KR og Breiðabliki, í leiknum í dag.

„Það var gaman. Hann lét mig einu sinni vinna virkilega fyrir því þegar hann steig inn í mig. Það var bara gaman og heiður."

Keyrði á möguleikann þegar opnaðist á hann
Af hverju fór Arnór frá KR í vetur og gekk í raðir Breiðabliks?

„Það var bara spurning um hvernig ég ætlaði að verja síðustu árunum. Þetta hvarflaði ekkert að mér, ég ætlaði bara að enda þetta í KR. Svo einhvern veginn fór ég að hugsa málið aðeins og þessi möguleiki opnaðist. Ég ákvað bara að keyra á þetta og sé alls ekki eftir því. Mér líður gríðarlega vel með þessi skipti."

Ótrúlega erfið ákvörðun - Erfitt að sjá gömlu félagana í þessari stöðu
Arnór er 37 ára gamall. Er hann búinn að ákveða að þetta sé síðasta tímabilið á ferlinum?

„Nei nei nei," sagði Arnór og brosti. „Mér finnst þetta svo gaman. En við sjáum bara hvað gerist, hvað guð og lukkan leyfir."

„Já, það voru tvö lið, annað hvort Breiðablik eða KR. Það stóð til boða að vera áfram í KR, það var möguleiki sem ég ígrundaði vel og þetta var ótrúlega erfið ákvörðun fyrir mig," sagði Arnór.

Hvernig er að sjá KR í þessari stöðu, með fjögur stig í næst neðsta sæti sem stendur?

„Mjög erfitt, ég horfði á Valsleikinn og mér leið bara alls ekki vel að horfa upp á mína gömlu félaga í þessari stöðu. Það svíður að einhverju leyti."

Var extra gírun að vita að hann væri að fara spila við KR í dag?

„Ég fann fyrir einhverri eftirvæntingu, mjög jákvæðri eftirvæntingu, extra fiðrildi einhver," sagði Arnór að lokum.

Sjá einnig:
Óskar Hrafn um Arnór og Andra: Gefa okkur allt þetta þrennt
Skilur afstöðu Arnórs mjög vel - „Einn besti leikmaður deildarinnar í mörg ár"
Óskar Hrafn: Löngu tímabært að Arnór komi heim