Orri Steinn átti skotið sem Demiral varði
Merih Demiral, varnarmaður Tyrklands, er stálheppinn að vera enn inni á vellinum eftir að hafa nokkuð augljóslega varið boltann á marklínu í teig tyrkneska liðsins.
Lestu um leikinn: Ísland 2 - 4 Tyrkland
Tyrkir höfðu fengið tvær vítaspyrnur í leiknum en seinna vítið var nokkuð grimm ákvörðun.
Í stöðunni 2-1 fyrir Tyrkland var vandræðagangur í teig Tyrkja og var það Orri Steinn Óskarsson sem náði skoti en Demiral var mættur á marklínuna.
Hann gerði sig breiðan og hreinlega varði skot Orra með höndinni, en VAR skoðaði atvikið og ákvað að senda ekki Damian Sylwestrzak, dómara leiksins, að skjánum. Demiral var á gulu spjaldi og hefði því fengið sitt seinna gula og þar með rautt.
Mjög svo undarleg dómgæsla og sérstaklega miðað við línuna hjá VAR og dómarateyminu í þessum leik.
Andri Lucas Guðjohnsen jafnaði metin stuttu síðar með skalla áður en Arda Güler kom Tyrkjum aftur í forystu eftir slæm mistök Hákonar Rafns Valdimarssonar.
Athugasemdir
